Tabıǵat janashyrlary aqqýlardy nanmen tamaqtandyrmaýǵa shaqyrdy

AQTAÝ. KAZINFORM — «Qazaq balyk» respýblıkalyq balyq sharýashylyǵy jáne akvamádenıet qaýymdastyǵy Mańǵystaý oblysy boıynsha fılıalynyń dırektory Danııar Ákimjanov aımaq turǵyndaryn aqqýlardy nanmen qorektendirmeýge shaqyryp, onyń zııanyn túsindirdi.

Sarapshynyń aıtýynsha, nan - aqqýlarǵa zııan. Ol tez toıdyrǵanymen, quramynda qajetti dárýmender men mıkroelementter joq. Sondyqtan aqqýlardy únemi nanmen qorektendirý olardyń densaýlyǵyna keri áser etýi múmkin.

- Mundaı áreket, ásirese balapandar úshin qaýipti. Nandy uzaq ýaqyt tutyný súıek pen qanattyń damýynyń buzylýyna, sondaı-aq aǵzanyń álsireýine ákelýi yqtımal. Budan bólek, jelinbeı qalǵan nan qaldyqtary sýǵa túsip, shirip, bakterııalardyń kóbeıýine jáne sý aıdyndarynyń jaǵdaıynyń nasharlaýyna sebep bolady, - deıdi ol.

Mamandar qustardy tamaqtandyrǵysy kelgen jaǵdaıda, laıyqty ónimderdi tańdap, ony sırek ári az mólsherde berý kerektigin aıtady. Ol úshin týralǵan qyryqqabat, japyraqty kókónister, úgitilgen sábiz nemese qustarǵa arnalǵan arnaıy jem qoldanýǵa bolady.

- Eń durys sheshim - aqqýlardyń tabıǵı meken etetin ortasyn saqtaý. Tabıǵı jaǵdaıda olar óz qoregin ózderi - sý ósimdikteri men usaq jándikterdi taýyp jeıdi, bul olardyń tolyqqandy ári qaýipsiz qorektenýin qamtamasyz etedi, - deıdi Danııar Ákimjanov.

Aıta keteıik, bıyl óńirde 25 myńdaı aqqý qystap jatyr. Olardyń shamamen 3,5 myńy Qarakól kólinde. 

Buǵan deıin, Mańǵystaýda jaǵalaýdan ólgen aqqýlar tabylǵan bolatyn. Keıin, Mańǵystaýlyq ekologter aqqýlardyń ólimine qatysty zertteý nátıjesin jarııalady.