Tabıǵat resýrstaryn zańsyz shyǵarý saldarynan memleketke keltirilgen shyǵyn somasy 15 mlrd. teńgeden asty - Bas prokýratýra

ASTANA. QazAqparat - Qazaqstan Respýblıkasynyń Bas prokýratýrasy balyq resýrstaryn óndirý jáne onyń aınalymy salasynda júrgizgen taldaý nátıjeleri boıynsha eleýli zań buzýshylyqtardy anyqtady.

Balyq sharýashylyǵynyń baı sý qoryna jáne mundaǵy balyq ósirý men balyq aýlaýdy qarqyndy damytýǵa qolaıly jaǵdaılar bolýyna qaramastan elimizdiń balyq qorlary azaıyp barady. Buǵan ónerkásiptik deńgeıge jetken brakonerlik sebep bolyp otyr, dep habarlaıdy Bas prokýratýranyń baspasóz qyzmeti.

Tek 2012-2015 jyldarda Qazaqstannan eksporttalatyn balyq ónimderiniń 30%-yn nemese 40 myń tonnanyń 13,7 myń tonnasyn brakonerler shyǵardy. Zańsyz aýlanǵan balyqty shekaradan shyǵarýdy uıymdasqan qylmystyq toptar jalǵan kásiporyndar jelisi arqyly jáne onyń shyǵý zańdylyǵy týraly jalǵan qujattardy paıdalaný jolymen iske asyrady.

Osy rette kórsetilgen kezeńde kóleńkeli aınalym mólsheri shamamen 100 mln. AQSh dollaryn qurady, tabıǵat resýrstaryn zańsyz shyǵarý jáne salyq tóleýden jaltarý saldarynan memleketke keltirilgen shyǵyn somasy 15 mlrd. teńgeden asty.

Bas prokýratýranyń taldaý materıaldary boıynsha Qarjy mınıstrliginiń Memlekettik kirister komıteti QR Qylmystyq kodeksiniń 335 jáne 245-baptary (asa iri zııan keltirýmen uıymdasqan top jasaǵan zańsyz óndirý jáne salyq tóleýden jaltarý) boıynsha sotqa deıingi tergeýdi bastady jáne júrgizýde.

Prokýratýra organdary balyq ónimderiniń zańsyz aınalymy faktilerin budan buryn da anyqtaǵan edi. Mysaly, 2010-2012 jyldarda Shyǵys Qazaqstanda 54 adamǵa qatysty Zaısan-Ertis basseıni sý qoımalarynda brakonerler aýlaǵan 22,2 myń tonna balyqty shyǵarý faktisi boıynsha 114 qylmystyq is qozǵalyp, tergeldi. Sonda memleketke keltirilgen shyǵyn 11 mlrd. teńgeden astam boldy. Kináli adamdar sottaldy.

Qarastyrylyp otyrǵan salada zańdylyqty qamtamasyz etý úshin mańyzdy mindetterdiń biri qoldanystaǵy zańnamany jetildirý jáne ókiletti memlekettik organdardyń (aýyl sharýashylyǵy, qarjy jáne ishki ister mınıstrlikteri) jumysyn jandandyrý bolyp tabylady.

Bas prokýratýra Qazaqstan Respýblıkasynyń Úkimetine osy baǵyttaǵy sáıkes sharalardy qabyldaý týraly máselelerdi sheshýdi usynyp otyr.