Tabıǵat kórkine nuqsan kelmesin: baıanaýyldyq jastar týrısterdi tazalyqqa shaqyrdy
PAVLODAR. KAZINFORM — Baıanaýyl jerinde respýblıkalyq «Taza Qazaqstan» aktsııasy aıasynda tazalyq sharalary jalǵasyn taýyp jatyr. Jergilikti belsendi jastar men aýdandyq qoǵamdyq keńestiń uıymdastyrýymen, sondaı-aq Baıanaýyl memlekettik ulttyq tabıǵı parkiniń qoldaýymen Sabyndykól mańaıy retke keltirildi.
Memleket basshysy Qasym-Jomart Toqaev «Taza Qazaqstan» jalpyulttyq ekologııalyq aktsııasynyń erekshe mańyzy týraly únemi aıtyp keledi. Aktsııa maqsaty — tabıǵatqa qamqorlyq jasaý mádenıetin qalyptastyrý jáne eldegi ekologııalyq jaǵdaıdy jaqsartý. Bul bastama qazaqstandyqtardy biriktirip, olardy týǵan tabıǵatqa qamqorlyq jasaý ıdeıasynyń tóńireginde biriktire aldy. Prezıdent aıtqandaı, oıdyń da, boıdyń da, qorshaǵan ortanyń da tazalyǵyn saqtaý — ár adamnyń ishki mádenıetiniń kórsetkishi. Sondyqtan tazalyq halqymyzdyń bolmysyna sińgen qasıet bolýy qajet.
— Tazalyq ár adamnan, ár úıden, árbir kóshe men ár qaladan bastalýy kerek. Óıtkeni «Taza Qazaqstan», bul — bir kúndik naýqan emes. Bul — bizdiń ómir saltymyz. «Jas kelse — iske» dep halqymyz beker aıtpaǵan. Barshańyzdy tabıǵatty qorǵaý ıdeıasy biriktirip otyr. Sizder bárińiz birge istep jatqan jumystyń arqasynda bul ıgi bastama osyndaı úlken qozǵalysqa aınaldy. Ortaq iske kúsh jumyldyrý degenimiz — osy, — degen edi Memleket basshysy.
«Taza Qazaqstan» ekologııalyq aktsııasyn Ertis-Baıan óńiriniń jurtshylyǵy belsendi túrde qoldap otyr. Jergilikti kásipkerler men iri óndiris oryndary abattandyrý jáne sanıtarııalyq tazartý jumystaryn turaqty júrgizip keledi. Kásiporyndar «jasyl aımaqtardaǵy» kóshetterdiń sanyn kóbeıte túsken. Al aýyl-aýdandar óz aýmaqtaryn retke keltirip, kúl-qoqystan aryltyp jatyr.
Máselen, tazalyq sharalary Baıanaýyl aýdanynda turaqty júrgizilip kele jatyr. Kezekti tazalyq sharalary búgin de uıymdastyryldy. Baıanaýyl aýdanyndaǵy belsendi jastar men aýdandyq qoǵamdyq keńestiń uıymdastyrýymen, sondaı-aq Baıanaýyl memlekettik ulttyq tabıǵı parkiniń qoldaýymen ótken «Kórkem Baıanaýyl» atty sanıtarlyq is-shara barysynda qatysýshylar Sabyndykól jaǵajaıyn qoqystan tazartty. Shara barysynda jastar men qoǵamdyq keńes músheleri judyryqsha jumyldy. Uıymdastyrýshylar atap ótkendeı, sharanyń basty maqsaty — qorshaǵan ortany taza ustaý, tabıǵattyń sulý beınesin saqtaý jáne aýdan turǵyndary men qonaqtaryn tabıǵatymyzdy lastamaýǵa shaqyrý.
— Qurmetti jerlester men qonaqtar! Bizdiń ásem tabıǵatymyzdy saqtaý — bárimizdiń mindetimiz. Taza jerde júrgen adamnyń jany da, isi de taza bolady. Sondyqtan tynyǵý oryndarynda, tabıǵat aıasynda aınalaǵa qamqorlyqpen qarap, qoqysty kez kelgen jerge tastap ketpeýlerińizdi suraımyz. Tabıǵat ananyń bizge bergen baılyǵyn keler urpaqqa aman-saý jetkizýimiz kerek, — deıdi aýdandyq qoǵamdyq keńes tóraǵasy Aspanbek Aǵymbekov.
Málimet retinde atap óteıik, ótken jyly Baıanaýyl aýmaǵynda 161 myńnan astam týrıst tynyqqan. Ulttyq park basshylyǵy demalýshylar sany bıyl eselene túsetinin boljap otyr. Endeshe rekreatsııalyq aımaqqa túsetin júkteme odan saıyn aýyrlaı beretini anyq. Sondyqtan týrısterdiń nazaryn tazalyq máselesine aýdarý mańyzdy.
Kóp adamdar «Taza Qazaqstan» bul — ádettegi senbilik ótkizý dep oılaıtyny ras. Deıturǵanmen bul aktsııanyń máni tereńde, ol bizdiń zamandastarymyzdy ekologııalyq turǵydan tárbıelep, qorshaǵan orta jaıly bilimin jetildiredi. Baıanaýyl jastar ortalyǵy ekologııalyq top quryp, kópshilik oryndardy, úı aýlalaryn, tabıǵat aýmaqtaryn, kóshelerdi tazalap júr.
— Baıanaýyl jastary udaıy belsendi. «Taza Qazaqstan» aktsııasy boıynsha sanıtarlyq tazalaý sharalaryn bul joly Sabyndykól mańaıynda júrgizdik. 30-40 qaptaı qoqys shyǵaryldy. Negizi Sabyndykól jaǵasynyń biraz bóligi ulttyq parkke, qalǵany ákimdikke qaraıdy. Biraq biz aýmaqty bólip-jarmaı kól mańaıyndaǵy barlyq jerdi, taý-tasty tazartyp jatyrmyz. Kelimdi-ketimdi adamdar tamaq qaldyqtaryn, turmystyq zattardy laqtyryp ketedi. Budan tabıǵatqa qanshama zııan keledi. Keıde shyny qutylardyń synyqtarynan, temki tuqylynan órt te shyǵatyn jaǵdaılar kezdesedi. Tabıǵat – taýsylmaıtyn baılyq emes. Jumysymyz munymen shektelmeıdi. Mektep oqýshylaryn tartyp, is-sharalarymyzǵa jumyldyryp jatyrmyz. Óskeleń urpaq qorshaǵan ortany qorǵaýǵa qazirden úırenýleri kerek. Aldaǵy ýaqytta «Kempirtas» tabıǵı eskertkishine, «Qońyr áýlıe» úńgirine, «Saryadyr» qoınaýyna baryp, tazalyq júrgizemiz, — deıdi aýdandyq jastar ortalyǵynyń dırektory Renat Ildın.
Halqymyz ejelden tabıǵatqa, óz úıiniń jáne aınalasynyń taza bolýyna uqypty qaraǵan. Elimizde osy ıgi dástúrlerdi jańǵyrtýǵa arnalǵan «Taza Qazaqstan» aktsııasy ótip jatqany qýantady. Osyndaı birlesken is-qımylymyzdyń nátıjesinde biz aınalamyzdy únemi muntazdaı taza etip ustaı alamyz.
Eske sala keteıik, «Taza Qazaqstan» aıasynda stýdentter Baıanaýyl ulttyq parkindegi kólderdi qoqystan tazartty.