Tabıǵat qorǵaýshylar elordany eleń etkizgen eliktiń jarasyn jazyp, erkindikke qoıa bermek
NUR-SULTAN. QazAqparat – Tabıǵat qorǵaýshylar elordany eleń etkizgen, múıizinen jaraqat alǵan eliktiń jarasyn jazyp, erkindikke jibermek, dep habarlaıdy QazAqparat tilshisi.
«Búgin kúndiz áleýmettik jeliler arqyly elordada shaýyp júrgen eliktiń vıdeosy tarap ketti. Vıdeomaterıaldy kórgennen keıin biz elikti izdestirý jumystaryna birden kirisip kettik. Ózimmen birge Aqmola oblystyq aýmaqtyq orman sharýashylyǵy jáne janýarlar álemi ıspektsııasynyń mamandary Uly Dala, Máńgilik el, Turan kóshelerin aralap, Mega OSO, Ekspo, Nazarbaev ýnıversıteti jaǵyn kórip qaıttyq. Arada bir jarym saǵat ótkende elik jańadan salynyp jatqan turǵyn úıdiń mańynan tabyldy», - dep jazady QR Aýyl sharýashylyǵy mınıstrliginiń Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Facebook paraqshasynda.
Túz taǵysy múıizinen jaraqat alǵan kórinedi. Elikti ustap alǵannan keıin tabıǵat qorǵaýshylar ony veterınarlyq qyzmet ortalyǵyna aparǵan.
«Veterınarlar eliktiń jarasyn emdep, ýaqytsha ózderinde qaldyrdy. Mamandar belgili bir merzim ishinde elikti baqylaıdy. Jaǵdaıy jaqsarsa qaıtadan dalaǵa qoıa beredi», - dep jazady ol.
Sáken Dildahmet elordanyń mańynda jabaıy ańnyń mol ekenin aıtady. Túz taǵysy aqtútek borannan adasyp nemese azyq izdep qalaǵa kirip ketken bolýy kerek.
«Ótken jyly da osyndaı jaǵdaı tirkelgen. Osy jaǵdaıǵa beı-jaı qaramaǵan azamattarǵa alǵysymyzdy aıtamyz. Eger qandaıda da bir jabaıy ańdy kórip qalsańyz 8(7172) 749170 nemese 87755050155 nómirine habarlasýyńyzǵa bolady», - deıdi ol.
Buǵan deıin QazAqparat EKSPO mańynda elik shaýyp júrgenin habarlaǵan bolatyn. Kóp ótpeı ony mamandar ustap alǵan edi .
