Tabıǵat qorǵaý zańnamalaryn tekserý kezinde 355 adam qylmystyq jaýapkershilikke tartyldy, olardyń 64-i - TMD azamattary
ASTANA. 18 qańtar. QazAqparat - «Bas prokýratýra qylmystyq qýdalaý organdarynyń 2010 jyly jáne 2011 jyldyń 9 aıyndaǵy tabıǵat qorǵaý zańnamasyn buzý týraly qylmystyq isterdi tergeýge deıingi tekserý jáne
tergeý júrgizý zańdylyǵynyń jaı-kúıin qorytyndylady»,-dep habarlaıdy vedomstvonyń baspasóz qyzmeti.
Statıstıkalyq málimetterge sáıkes, 2010 jyly - 343, al 2011 jyldyń 9 aıynda 189 ekologııalyq qylmys tirkelgen. Taldaý elimizdegi qorshaǵan ortaǵa antropogendik áserdiń órshigenin kórsetti, al brakonerliktiń saldarynan kóptegen ańshylyq obektisine jatatyn janýarlar men balyqtyń baǵaly túrleri azaıýda. Jalpy quqyq qorǵaý organdary ekologııalyq qylmystardyń profılaktıkasy, kináli adamdardyń qylmystyq jaýapkershilikke tartylýy jáne materıaldyq zalaldyń der kezinde óndirilýi boıynsha sharalar qabyldaýda. Tekserý kezeńinde 355 adam qylmystyq jaýapkershilikke tartylǵan, olardyń 64-i - TMD azamattary.
Degenmen, jekelegen qylmystyq ister tergeý sapasyn jaqsartýdy qajet etedi. Mysaly, janýarlardyń ushasymen nemese olardyń ónimderimen ustalǵan keıbir brakonerler qylmystyq jaýapkershilikten qutylý maqsatynda ony belgisiz adamdardan satyp aldyq nemese daladan taýyp aldyq dep kórsetedi. Alaıda, ishki ister organdary atalǵan aıǵaqtardy teksermeıdi jáne oǵan tıisinshe baǵa bermeıdi. Birqatar ashylmaǵan qylmystar jóninde toqtatylǵan qylmystyq isterdi zerdeleý qorytyndysy boıynsha prokýrorlar tergeýdi qaıta jańǵyrtý jáne naqty tergeý amaldaryn júrgizý týraly nusqaýlar berdi.
Qorytyndylaý nátıjesi boıynsha Bas prokýratýra Іshki ister mınıstrligine aýmaqtyq ishki ister organdary qyzmetin ekologııalyq qaýipti hımııalyq, radıoaktıvtik jáne bıologııalyq zattardy paıdalanýmen, sýlar men teńizdiń lastanýy, jutańdanýy, sondaı-aq jerdi búldirý jáne erekshe qorǵalatyn tabıǵı aýmaqtar rejimin buzýǵa baılanysty qylmystardy anyqtaý jáne jolyn kesýge baǵyttaý máselesin kótere otyryp usynys engizdi.
