Tabıǵat qorǵaý uıymdary erkekterge naýryzdyń 8-ine súıiktilerine báısheshek syılamaýǵa shaqyryp otyr
ALMATY. Naýryzdyń 3-i. QazAqparat /Erbol Azanbek/ - Kóktem kelisimen jer betine alǵash shyǵatyn báısheshek, Alataý shafrany, jartas fıalkasy syndy gúlder sońǵy jyldary 2-3 esege deıin azaıyp ketti.
Bul týraly búgin Almatyda kóktemniń alǵashqy gúlderin qorǵaýǵa baılanysty arnaıy baspasóz máslıhatyn ótkizgen BUU damý baǵdarlamasy, Almaty qalalyq tabıǵı resýrstar jáne tabıǵatty paıdalanýdy retteý basqarmasynyń ókilderi málim etti, dep habarlaıdy QazAqparat.
BUU Damý baǵdarlamasynyń Qazaqstandaǵy ulttyq menedjeri Quralaı Káribaevanyń aıtýynsha, kóktem shyǵysymen qyltııatyn bul gúlderdiń qyzý saýdasy bastalady. «Bul gúlder onsyz da elimizdiń qyzyl kitabyna engizilip, joıylyp ketý aldynda turǵan gúlder sanatynda. Jappaı julyp, satýdyń nátıjesinde sońǵy 10 jylda bul gúlder Almaty mańynan 5-7 shaqyrymǵa deıin «alystap» ketti. Sondyqtan qoǵam bolyp bul máselege nazar aýdarýymyz qajet» deıdi Q.Káribaeva. Ol sondaı-aq tabıǵatty qorǵaý uıymdarynyń atynan aldaǵy 8 naýryz merekesinde barlyq erkekterge báısheshek pen Alataý shafrany syndy gúlderdi satyp alyp, syılamaýdy ótinetinin aıtady. Onyń aıtýynsha, bul gúlderdi julý onyń tozańdanyp úlgermeı, nátıjesinde sanynyń azaıýyna ákep soǵyp otyr.
Almaty qalalyq tabıǵı resýrstar jáne tabıǵatty paıdalanýdy retteý basqarmasynyń ókili Nazııa Aýhınovanyń aıtýynsha, qyzyl kitapqa engen kóktemniń alǵashqy gúldiń ár talyn ruqsatsyz jınaǵanǵa 0,5 AEK nemese 706,5 teńge kóleminde aıyppul salynady. Alaıda bul jańa qyltıǵan báısheshekti julyp satýshylardy toqtata almaı otyr. Qazirdiń ózinde Almatynyń ár jerinde báısheshek saýdasy qyzyp tur. 10-15 gúlden turatyn gúldesteniń baǵasy 300-500 teńge kóleminde satylýda.
