Tabıǵat qorǵaý ınspektorlary kıikterdi mazalamaýǵa shaqyrdy
NUR-SULTAN. QazAqparat – 2019 jylǵy esep boıynsha elimizdegi aqbókenderdiń sany 334,4 myńǵa jetti. Bul týraly Aýyl sharýashylyǵy mınıstrliginiń Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet aıtty, dep habarlaıdy QazAqparat tilshisi.
Qazaqstanda kıikterdiń kúıleý kezeńi bastaldy. Janýarlardyń juptasý kezeńi shalǵaı jerlerde bolady. Olar osy kezeńde kúshterin joǵaltyp, jyrtqyshtar men brakonerlerdiń qurbanyna aınalady.
«Kúıleý kezeńinde aqbóken popýlıatsııasyn saqtaý úshin «Ohotzooprom» ÓB» RMQK ınspektorlary janýarlardy qorǵaýǵa kúsh salýda, sonymen qatar orman sharýashylyǵy men janýarlar dúnıesiniń aýmaqtyq ınspektsııasymen birlesip ekologııalyq zańdardyń buzylýyna jol bermeý úshin reıdter júrgizdi», - dep jazdy Sáken Dáldahmet Facebook-tegi paraqshasynda.
Orman sharýashylyǵy jáne janýarlar dúnıesi komıteti jergilikti turǵyndardy kúıleý kezinde kıikterdi mazalamaýǵa shaqyrady.
«Bul protsess 2020 jyldyń kókteminde aqbókenniń úsh popýlıatsııasynyń sanyn kóbeıtý naýqanynyń qanshalyqty sátti bolǵanyn anyqtaıdy. Kıikti zańsyz aýlaý úshin 500 AEK, aqbóken men tólin zańsyz aýlaý úshin 350 AEK kóleminde aıyppul salynady, sondaı-aq bas bostandyǵynan aıyrý túrindegi qylmystyq jaza qoldanylady», - deıdi ol.
2019 jylǵy esep boıynsha aqbókenderdiń sany 334 400-ge jetti.
