«Tabıǵat» ekoodaǵy elimizde barynsha kóp aǵash túrlerin otyrǵyzyp, Gınnestiń rekordtar kitabyna enbekshi
ALMATY. 3 naýryz. QazAqparat /Názıra Eleýhan/ - «Tabıǵat» ekologııalyq odaǵy búkil elimizde barynsha kóp ár túrli aǵash túrlerin otyrǵyzyp, Gınnestiń rekordtar kitabyna enýdi josparlap otyr.
"Biz kóktem merekesi - Naýryzdy osyndaı aktsııa ótkizip qarsy alýǵa shaqyramyz", - dedi tabıǵat qorǵaýshylar búgin Almatyda ótken arnaıy baspasóz máslıhatynda.
«Tabıǵat» Ekoodaǵynyń basshysy Mels Eleýsizovtyń aıtýynsha bul shara - keń aýqymdy aktsııa bolmaq. «Aktsııanyń birinshi kezeńi 20 naýryzda bastalady. Odan keıin aıdyń sońyna deıin qalǵan aǵashtar otyrǵyzylatyn bolady. Aıta ketetinim, bul aktsııa jańashyldyq emes, biz osy syndy aktsııany 10-15 jyldan beri ótkizip, aǵash egip kelemiz. «Rekord» kórsetý úshin bul sharany birinshi ret uıymdastyryp otyrmyz. Jyl saıyn Naýryz merekesi qarsańynda ár adam aǵash egýdi dástúrge aınaldyrsa, bul jaqsy ıgi iske aınalar edi. Bul aktsııa qyzyqty da, paıdaly bolady dep oılaımyn»,-dedi ol.
Onyń aıtýynsha qazirdiń ózinen tabıǵatshylar elimizdiń Prezıdentine úndeý jazyp, barlyq partııalar men ákimshilikterdi qoldaýǵa shaqyrýda.
"Eger barlyq qazaqstandyqtar aktsııaǵa qoldaý bildirse, biz mindetti túrde Gınnestiń rekordtar kitabyna enemiz jáne bul sharaǵa álemdik qaýymdastyq qosylady dep oılaımyn. Sonda ǵana bizdiń Naýryz merekesi búkil álemde toılanatyn bolady",-dedi ol.
