Tabıǵat» ekologııalyq odaǵynyń tóraǵasy Mels Eleýsizov kezekten tys Prezıdenttik saılaýǵa qatysýǵa ótinish berdi
ASTANA. 17 aqpan. QazAqparat /Aıdar Ospanalıev/ - Búgin Ortalyq saılaý komıssııasyna 3 sáýirge belgilengen kezekten tys Prezıdenttik saılaýǵa qatysýǵa 15-shi azamat ótinish berdi. Bul týraly Ortalyq saılaý komıssııasynyń baspasóz qyzmeti habarlap otyr.
Baspasóz qyzmetiniń málimetterine qaraǵanda ótinish bergen azamat «Tabıǵat» ekologııalyq odaǵynyń tóraǵasy Mels Eleýsizov. Ol Prezıdenttikkke kandıdattyqqa ózin-ózi usynyp otyr. Esterińizge sala keteıik, Mels Eleýsizov 2005 jyly ótken Prezıdenttik saılaýǵa qatysyp, saılaýshylardyń 0,28 paıyz daýsyn jınaǵan bolatyn.
Sonymen elimiz boıynsha Prezıdenttik saılaýǵa qatysýǵa bel býyp, OSK-na ótinish túsirgen azamattardyń sany - 15 adamǵa jetti. Olardyń 2-ýin, ıaǵnı "Kenesary han" qoǵamdyq qorynyń prezıdenti Ýálıhan Qaısarov pen Astana qalasynyń turǵyny, ýaqytsha jumyssyz Qanat Esjanovty Ortalyq saılaý komıssııasy memlekettik tildi jetkilikti deńgeıde meńgermegenderine baılanysty QR Prezıdenttigine úmitker retinde tirkeýden bas tartyp, tıisti qaýly qabyldady. Al taǵy bir úmitker pavlodaryq zeınetker Záýre Masına saılaýǵa túsý jónindegi ótinishin qaıtaryp aldy.
Prezıdenttikten úmitkerler retinde ótinish bergen azamattardyń ekeýi saıası partııalardyń atynan saılaýǵa túsedi. Atap aıtqanda OSK-ǵa osyǵan deıin «Nur Otan» Halyqtyq demokratııalyq partııasy usynǵan Elbasy Nursultan Nazarbaev ótinish berse, onyń izin ala Qazaqstannyń Kommýnıstik Halyqtyq partııasy atynan partııanyń hatshysy Jambyl Ahmetbekov qujat tapsyrdy. Al qalǵan úmitkerler ózderin ózderi usynǵandar.
Búginge deıin, atap aıtqanda qazirgi Memleket basshysy Nursultan Nazarbaev, zańger Sálim Óten jáne ekolog-ǵalym Musaǵalı Dýambekov jáne «Nur Islam» týrıstik fırmasynyń dırektory Qanat Týrageldıev lıngvıstıkalyq komıssııanyń synynan súrinbeı ótti. Qazirgi tańda memlekettik tilge baılanysty emtıhannan ótken azamattardyń arasynda Q.Týrageldıevten basqalary ózderin qoldaǵan saılaýshylardyń qoldaryn jınaýǵa kirisip ketti. OSK qabyldaǵan qaýlyǵa sáıkes, QR Prezıdenttigine kandıdatty qoldaǵan rastalǵan qoldardyń sany 91 010 qoldy quraýy tıis.
Al Prezıdenttik saılaýǵa qatysýǵa ózin-ózi usynǵan qalǵan kandıdattar mynalar: Pavlodar oblysynyń 55 jastaǵy turǵyny, ýaqytsha jumyssyz Nursıla Kúsetaıuly, «Bastıon- Ast» kúzet agenttigi» JShS-de kúzetshi bolyp isteıtin 48 jastaǵy Tolybaı Baımýrzın, «Attan, Qazaqstan» qozǵalysynyń jetekshisi Amantaı qajy Asylbek, 1954 jyly týylǵan jambyldyq Gúldana Toqbaeva, 1957 jyly týylǵan almatylyq Maıa Qaramaeva, 1968 jyly týylǵan Astana qalasynyń turǵyny Adalbek Qunanbaev.
