Tabıǵat, bal jáne etnotýrızm: Korobıha týrıster arasynda tanymal baǵytqa aınalyp keledi
ASTANA. KAZINFORM — Qazaqstannyń kórikti týrıstik aýyldarynyń biri Korobıha saıahatshylar arasynda tartymdy baǵytqa aınalyp otyr.
2024 jyly 2500 jýyq týrıst Shyǵys Qazaqstandaǵy osy eldi mekendi tańdady. Jergilikti qonaq úıler Jańa Zelandııa, AQSh, Frantsııa, BAÁ, Ońtústik Koreıadan jáne basqa elderden kelgen qonaqtardy qarsy alady.
Korobıha aýyly Katonqaraǵaı ulttyq parkiniń aýmaǵynda ornalasqan. Búginde bul eldi mekende týrısterge 170 astam bólme usynatyn 11 úı bar. Qonaqtar ortasha alǵanda óńirmen tanysýǵa 2-3 kúnge keledi. Saıahatshylarǵa tabıǵattyń qaıtalanbas sulýlyǵyn tamashalaý ǵana emes, etnografııalyq jáne keń aýqymdy týrıstik baǵyttardy tańdaý usynylady.
Týrıstik maýsym jaz aılarymen shektelmeıdi. Aýyl jyl boıy qonaqtardy qabyldaıdy. Qysta ormandarda serýendeý usynylsa, kóktem men jazda Buqtyrma ózeninde júzý, atpen serýendeý jáne balyq aýlaý kópshilik arasynda suranysqa ıe.
Korobıha bal ónimi - aýyldaǵy biregeı ónimderdiń biri. Maýsym kezinde týrısterge baldy óndirý týryna qatysý jáne omartadan jańa ónimdi synap kórý múmkindigi usynylady.
Qonaqtar mádenı muramen de tanysa alady. Aýylda ara sharýashylyǵy murajaıy, ólketaný murajaıy jáne qalpyna keltirilgen kóne shirkeý jumys isteıdi.
Týrısterge úı taǵamdarynan dám tatý, qysh qumyralarmen jáne qolmen jazylǵan kóne kitaptarmen tanysý jáne urpaqtan urpaqqa jalǵasqan qolóner túrlerin tamashalaý usynylady.
Jyl saıyn Korobıha aýylyna keletin saıahatshylar qatary kóbeıip, Qazaqstannyń týrıstik kartasyndaǵy tanymaldyǵy artyp otyr.
Aıta ketelik sheteldik saıahatshylardyń Qazaqstanǵa degen qyzyǵýshylyǵy 3 ese artqan.