Tabare Vaskes Ýrýgvaı prezıdenti bolyp saılandy
ASTANA. QazAqparat - Ýrýgvaı prezıdenti bolyp «Keń maıdan» solshyl koalıtsııa ókili Tabare Vaskes saılandy. Bul týraly ońtústikamerıkandyq respýblıkanyń Saılaý soty (saılaý komıssııasy) jarııalaǵan resmı nátıjeler qýattaıdy, dep habarlady TASS.
Bıýlletenderdiń 49 paıyzy óńdelgennen keıin 2005-2010 jyldarda el basqarǵan 74 jastaǵy onkolog-dáriger saılaýshylardyń 52 paıyz daýysyn jınady. Onyń qarsylasy - ońshyl Ulttyq partııadan usynylǵan burynǵy memleket basshysynyń uly 41 jastaǵy Lýıs Lakale Poý elektorattyń 42,9 paıyz qoldaýyna ıe boldy.
Ýrýgvaıdyń burynǵy parezıdenti - Vaskes bes jylǵy úzilisten keıin bılikke oraldy. Naq osy Vaskes 2004 jyly 1830 jyldan beri bılikti bermeı kele jatqan dástúrli ońshyl saıası kúshter - «Kolorado» partııasy men Ulttyq partııany yǵystyryp, tarıhı jeńiske jetken edi. 2010 jyly óziniń ókilettik merzimi aıaqtalǵannan keıin Vaskes memleket basshysy tizginin solshyl koalıtsııadaǵy Hose Mýhıkege bergen bolatyn, ol konstıtýtsııaǵa sáıkes ekinshi merzimge qatarynan saılana almaıdy.
Óziniń jaqtastary aldynda sóılegen sózinde Vaskes «kimge daýys bergenine qaramastan, barlyq ýrýgvaılyqtardyń prezıdenti bolýǵa» ýáde berdi.
Óz kezeginde ońshyl Ulttyq partııadan Ýrýgvaı prezıdenttigine úmitker Lakale Poý óziniń jeńilgenin moıyndap, qarsylasyn jeńisimen quttyqtady.
