«Tabaldyryq» - qoǵamdaǵy kúrdeli saıası, áleýmettik jáne rýhanı ózgerister jaǵdaıynda ómirge kelgen týyndy - tarıhshy Mámbet Qoıgeldi
ALMATY. 31 qańtar. QazAqparat /Erlik Erjanuly/ - «Tabaldyryq» jaı, aǵymdaǵy shyǵarma emes. Ony ómirge ákelgen sol tarıhı mezgilde ıleýge túsken qazaq shyndyǵy. Bul týraly búgin Almatyda Maǵjan Jumabaevtyń jeke kitap bop jaryq kórgen "Tabaldyryq. Manıfest» eńbeginiń tusaýkeserinde aıtyldy.
«Jahandanýǵa, sheteldik otarlaýshylyqqa qarsy qoıatyn bir-aq kúsh bar, ol - ulttyq negiz. Ulttyq rýh, ulttyq mádenıet pen ulttyq tilsiz jahandanýǵa eshbir el qarsy tura almaıdy. Maǵjan óz shyǵarmasy arqyly osy ulttyq negizdi qorǵaıdy», - deıdi kitapty qurastyrýshylardyń biri, Qazaqstan tarıhshylar qaýymdastyǵynyń prezıdenti Mámbet Qoıgeldi. Ǵalymnyń paıymdaýynsha, «Tabaldyryq» jazylǵan ýaqyt qazaq zııalylary úshin kúrdeli de aýyr ýaqyt bolatyn. Ult-azattyq qozǵalystyń jeńiliske ushyraýy, memlekettik avtonomııa alý áreketiniń iske aspaı qalýy ult zııalylaryn tuıyqqa tiredi. «Tabaldyryq» arqyly Maǵjan aqyn qalamdastaryna osy tyǵyryqtan shyǵatyn joldy usyndy. Onyń ustanymynda ádebıet ıdeologııa quraly bolýǵa tıis emes. Onyń mindeti ulttyń bıik adamgershilik, azamattyq jáne estetıkalyq sezimin oıatyp qalyptastyrý arqyly ony jańa ómirge daıarlaý edi.
«Biz búgin ótken ǵasyrdyń 20-jyldary, qazaq ádebıetinde «Tabaldyryq» sııaqty shyǵarmanyń ómirge kelip, sol arqyly qazaq eliniń kúrdeli ózgeristerge qatysty óz kózqarasy men ustanymyn bildire alǵan el qatarynda bolǵandyǵyn maqtan tutmyz. Uly Maǵjan aqynnyń qalamynan týǵan «Tabaldyryq» qazaq kórkemdik oıy men mádenıetin álemdik órkenıetpen jalǵastyryp, qazaq elin álemdik mádenı keńistikte óz orny, óz qoltańbasy bar ult dárejesine kóterip tur. Maǵjan túsiniginde ádebıet ulttyq sananyń oıanýyna ǵana emes, jańa zaman, jańa jaǵdaıda ulttyq sananyń kemeldikke ótýine kómektese alady», - dedi tarıh ǵylymynyń doktory, professor Mámbet Qoıgeldi.
