«Tabaǵan» kesheninde sportshylarǵa barlyq jaǵdaı jasalǵan - QHR Frıstaıl oıyndary federatsııasynyń Bas hatshysy
ALMATY. 1 aqpan. QazAqparat /Ádilet Musahaev/ - Aq Azıadada bizdiń sportshylar medal alý úshin baryn saldy, alaıda qytaılyqtar ózderiniń myqtyraq ekendikterin baıqatty. Bul jaıynda búgin QR-nyń Frıstaıl jáne snoýbord federatsııasynyń vıtse-prezıdenti Elena Krýglyhına arnaıy ótken baspasóz máslıhatynda aıtty.
Sondaı-aq ol keleshekte de qytaılyq áriptesterimen jaqsy baılanys ornatyp, olardyń sportshylaryn osy sport túrinen elde ótetin jarystarǵa qatysýyna bar múmkindikti jasaıtyndyqtaryn aıtty. «Qytaılyq sportshylardyń da «Tabaǵan» sporttyq-saýyqtyrý keshenine kelip jattyǵý jasaýyna múmkindik jasap, kórshi el retinde sportshylar arasynda dostyq kezdesýler ótkize otyryp, tájirıbe bólisemiz dep oılaımyn», -deıdi vıtse-prezıdent.
«Bizdiń sportshylarǵa osy jerde óner kórsetý múmkindigi týǵanyna óte qýanyshtymyz. Ásem tabıǵat aıasynda ornalasqan bul sport kesheninde sportshylarǵa barlyq jaǵdaı jasalǵan. Búgin qazaqstandyq sportshylar da ózderiniń myqty ekendikterin kórsetip, joǵary orynnan kórindi. Aldaǵy ýaqytta da qazaq eliniń sportshylary tek joǵary dárejeli óner kórsetedi dep oılaımyn», -dep atap ótti óz sózinde QHR Frıstaıl oıyndary federatsııasynyń Bas hatshysy Ian Sıaýjýan (Yan Xianojuan).
Búgin frıstaıldan akrobatıka boıynsha erler arasynda chempıon atanǵan qytaılyq Zongıang Jıa qazaq elinde altyn alqa taǵynǵanyna óte qýanyshty ekendigin aıtady. «Búgin óte sátti óner kórsettim dep oılaımyn, alaıda búgingi sekiristen de kúrdeli jattyǵýdy jasaý qolymnan keledi», -deıdi chempıon.
