T. Júrgenov atyndaǵy Qazaq ulttyq óner akademııasynda Dáýren Ábirov pen Mintaı Tileýbaev dárishanalary ashyldy
ALMATY. Qyrkúıektiń 22-si. QazAqparat /Erbol Turymbetov/ - Búgin Temirbek Júrgenov atyndaǵy Qazaq ulttyq óner akademııasynda QR-nyń halyq ártisi, professor Dáýren Ábirov pen QR-nyń eńbek sińirgen óner qaıratkeri Mintaı Tileýbaev dárishanalarynyń saltanatty ashylý rásimderi ótti,
dep habarlaıdy QazAqparat.
Ashylý saltanatynda akademııa rektory Arystanbek Muhamedıuly, oqytýshylar, belgili óner qaıratkerleriniń urpaqtary qatysty.
Dáýren Tastanbekuly Qazaq ulttyq óner akademııasynda 1978-2001 jyldar aralyǵynda qyzmet etken ulaǵatty ustaz. GITIS - Reseı teatr óneri akademııasyn 1949 jyly bitirgen ol elimizdiń tuńǵysh baletmeısteri boldy. Kóp jyldar boıy Abaı atyndaǵy Memlekettik opera jáne balet teatrynda qyzmet etip, kóptegen baletterdiń qoıýshysy boldy. 1994 jyly osy oqý ornynda, onan keıin Qyzdar pedagogıkalyq ınstıtýtynda (qazir ýnıversıtet) horeografııa kafedrasyn ashty. Edýard Malbekov, Inessa Manskaıa syndy QR eńbek sińirgen ártisteri onyń tárbıesin kórgen. Qazaqtyń tuńǵysh baletmeısteri 2001 jyldyń 5-shi mamyrynda dúnıeden ozdy
Mintaı Tileýbaev akademııanyń 1975 jyldan bergi ustazy. Reseıdegi N. Rımskıı-Korsakov atyndaǵy Lenıngrad konservatorııasynyń túlegi. 1994 jylǵy horeografııa kafedrasynyń ashylýyna atsalysqan. 1998 jylǵy jańa elordanyń ashylý saltanatynyń Bas qoıýshysy bolǵan.
«Ol stýdent kezinen qoıylymdar sahnalap, oqý bitirgen soń birneshe jyl sol Konservatorııada qyzmet etti. Keıinnen Almatyǵa kelip, elimizdegi horeografııa óneriniń damýyna kóp eńbek sińirgen edi», deıdi óner qaıratkeriniń jubaıy Svetlana Tışenko. Onyń aıtýynsha, aldaǵy jeltoqsan aıynda M. Tileýbaevty eske túsirý kontserti ótkizilgeli otyr.
Ustazdyń úlken uly Marat qazir mýzykant, «Ýlybka» balalar qýyrshaq teatrynyń dybys rejıssery. Al ákesiniń jolyn qýǵan keıingi uly Maılen búginde Japonııadaǵy Tokıo balet teatrynyń jetekshi solısi.
