T. Jaqsylyqov: Eýrazııalyq ıntegratsııadaǵy Qazaqstannyń maqsaty - taýar ótkizý naryǵyn keńeıtý
ASTANA. 10 qańtar. QazAqparat - 2014 jylǵy 1 qańtardan bastap BEK múshe elderi memlekettik satyp alýlarǵa ulttyq tártiptemeni usynýda. Bul óz kezeginde qazaqstandyq ónim jetkizýshilerge reseılik jáne belarýstik ónim berýshilermen teń dárejede Reseı men Belarýs elderiniń memlekettik jáne mýnıtsıpaldyq satyp alýlaryna qatysýǵa múmkindik beredi. Bul týraly Eýrazııalyq ekonomıkalyq odaq Kelisimi jobasyn talqylaý jónindegi otyrys barysynda QR Ekonomıka jáne bıýdjettik josparlaý vıtse-mınıstri Tımýr Jaqsylyqov aıtty.
Atalǵan mınıstrlik baspasóz qyzmetiniń derekterine súıensek, 2012 jyly BEK-ke múshe elderdiń memlekettik satyp alý naryǵynyń kólemi 198 mlrd. dollardy, al Qazaqstannyń memlekettik satyp alý naryǵy 7,6 mlrd. dollardy qurady. «Seriktes memleketter naryǵy otandyq naryqtan 26 ese artady. Bul otandyq taýar óndirýshilerge damý áleýetin arttyrýǵa serpin beredi», - dep túsindirdi T. Jaqsylyqov. Mınıstrlik málimetine qaraǵanda, Kedendik Odaq qurylǵannan beri múshe elder arasyndaǵy ózara saýda jasaý ósimi baıqalýdy. 2010 jyl men 2013 jyldyń qyrkúıegi aralyǵynda KO eki jaqty saýda ósiminiń jyldyq orta mólsheriniń qarqyny 15,8 paıyzdy qurady.
