Təýelsizdik kúnine oraı Elbasynyń atyna kelgen quttyqtaýlar legi jalǵasýda

ASTANA. QazAqparat - Memleket basshysynyń atyna ulttyq merekemiz - Qazaqstan Respýblıkasynyń Táýelsizdik kúnine oraı hattar men jedelhattar kelip tústi, dep habarlaıdy Aqordanyń baspasóz qyzmeti.

Nursultan Nazarbaevtyń atyna Qazaqstan Respýblıkasynyń Táýelsizdik kúnine oraı shet memleketterdiń basshylarynan quttyqtaý jedelhattar kelip tústi.

Iran Islam Respýblıkasynyń Prezıdenti Hasan Rýhanı óziniń hatynda: «Sońǵy jyldary ortaq maqsat pen múddeniń arqasynda bizdiń ekijaqty qarym-qatynasymyz jemisti damyp kele jatyr. Qazaqstan Respýblıkasy men Iran Islam Respýblıkasy óńirdegi yntymaqtastyq pen qaýipsizdikti nyǵaıtý isindegi senimdi seriktes bolyp sanalady», - dep atap kórsetken.

Morokko Koroli VI Muhammed jedelhatynda ózara qurmet pen dostyqqa negizdelgen eki el arasyndaǵy qarym-qatynastarǵa joǵary baǵa berip, onyń ári qaraı tabysty damı túsetinine senim bildirdi.

Avstralııanyń general-gýbernatory Pıter Kosgroýv óziniń jedelhatynda: «EKSPO-2017» kórmesiniń Astana qalasynda tabysty ótýimen quttyqtaımyn. Bul shara úkimetterimizdiń ókilderi men bilim salasyndaǵy mamandarymyzdyń kezdesýler ótkizýine múmkindik berdi», - dep atap ótken.

Memleket basshysyna jáne Qazaqstan halqyna óziniń quttyqtaýlaryn Shvetsııa Koroli Karl XVI Gýstav pen Brýneı Sultany Hadjı Hassanal Bolkııah joldap, baq-bereke tiledi, sondaı-aq elimizdiń ósip-órkendeýine nıettestik bildirdi.