T. Tóleshevtiń isi boıynsha 25 adam qylmystyq jaýapkershilikke tartylýda

ASTANA. QazAqparat - Burynǵy bıznesmen Toqtar Tóleshevtiń isi boıynsha 25 adam qylmystyq jaýapkershilikke tartylýda. Taǵy 300 adam kýáger retinde iske tartylǵan.

«Ulttyq qaýipsizdik komıteti Toqtar Júsipuly Tóleshevke qatysty qylmystyq istiń negizgi epızodtaryn tergeýdi aıaqtady. Osy iske baılanysty 25 adam qylmystyq jaýapkershilikke tartylýda. Taǵy 300-ge jýyq adam kýáger retinde iske tartylǵan»,-delingen Ulttyq qaýipsizdik komıtetiniń baspasóz máslıhaty aldynda taratqan aqparatynda.

Tergeý barysynda T.Tóleshovtiń birqatar aýyr jáne óte aýyr qylmys jasaǵany dáleldengen. Atap aıtsaq,oǵan Qylmystyq kodekstiń 125, 126, 179, 182, 192, 262, 265, 266, 268, 287, 296 jáne 367 baptary boıynsha, sondaı-aq Qylmystyq kodekstiń 1997 jylǵy redaktsııasyndaǵy 96, 107 jáne 187 baptary boıynsha aıyp taǵylyp otyr.

Ulttyq qaýipsizdik komıteti málim etkendeı, T.Tóleshov transulttyq qylmystyq topty qarjylandyryp, turaqty túrde qarýlanǵan topty qurǵan jáne ony basqarǵan.

«T. Tóleshev basqarǵan qylmystyq top onyń buıryǵymen adam óltirý, adam óltirýge áreket jasaý, adamdy zańsyz urlap, ony bostandyǵynan aıyrý, qorlaý, uryp-soǵý, bireýdiń múlkin ádeıi joıý isterimen aınalysqan»,- dep habarlady baspasóz  qyzmeti.

Tergeý anyqtaǵandaı, T. Tóleshev pen onyń biraz sybaılastary áleýmet arasynda shý shyǵaryp, jappaı tártipsizdik pen narazylyq sharalaryn uıymdastyrý arqyly bıliktiń kúshpen basyp alýǵa áreket etken.