T. Tóleshevtiń bılikti kúshpen basyp alýǵa qalaı daıyndalǵany egjeı-tegjeıli aıtyldy
ASTANA. QazAqparat - Qazaqstan Respýblıkasy Ulttyq qaýipsizdik komıteti baspasóz qyzmetiniń ókili Rýslan Qarasev Shymkenttegi bıznesmen Toqtap Tóleshev bılikti kúshpen basyp alýǵa qalaı daıyndalǵanyn egjeı-tegjeıli aıtyp berdi.
Buǵan deıin habarlaǵanymyzdaı, bılikti basyp alý josparyn oryndaý úshin T. Tóleshev aldymen eldegi jaǵdaıdy turaqsyzdandyrýǵa árekettengen. Bul úshin T. Tóleshov 2005 jáne 2010 jyly Qyrǵyz Respýblıkasynda bolǵan jaǵdaıdy óte muqııat zerttegen. Tipti, Qyrǵyzstanǵa ózi baryp, kerekti materıaldar men derek-dáıekter izdegen. Bılikke halyq arasynda jappaı tártipsizdik ornatyp, halyqty narazylyqqa azǵyrý arqyly kelýge bolatynyn túsingen ol bul aram pıǵylyn Qazaqstannyń batysynda tez júzege asyrýǵa bolady degen boljamǵa kelgen.
«Bılikti kúshpen basyp alý áreketi ótken jyldy bastalǵanyn aıta ketý kerek. Tóleshevtiń janynda júrgen adamdardyń tergeýge aıtyp bergenindeı, 2015 T. Tóleshev bir senimdi adamyna Atyraý qalasynyń turǵyndaryna jer máselesine qatysty qujattar men iri kólemde aqsha berýdi tapsyrǵan. Atyraý qalasynyń turǵyndary sáýir aıynda narazylyq aktsııasyna shyqty. Aqsha alǵan adamdar sáýir aıynda Atyraýda jáne mamyr aıynda Almatyda zańsyz mıtıngter uıymdastyrǵan. Tóleshevtiń kómekshileriniń biri tergeýge 50 myń AQSh dollaryn óz erkimen tapsyrdy. Bul aqsha osyndaı aktsııa uıymdastyrý úshin qajetti josparlanbaǵan shyǵyndy tóleýge arnalǵan bolyp shyqty»,-deıdi R. Qarasev.
Ulttyq qaýipsizdik komıtetiniń aqparatyna súıensek, ýaqytsha qamaý oqshaýlaǵyshyna túskennen keıin T. Tóleshev onymen habarlasa alatyn adamdar arqyly Ońtústik Qazaqstan oblysynyń Saryaǵash qalasynda jappaı tártipsizdik uıymdastyrýǵa talpynǵan. T. Tóleshev árqaısysyna 120 dollardan berip, keminde bes myń adamdy kóterińder degen buıryq beredi. Artynsha Saryaǵash qalasynyń ortalyǵynda qarýly qaqtyǵys uıymdastyrýdy josparlaıdy.
«Osy josparynan qaldyrmaı, T. Tóleshev Qazaqstannyń qazirgi zańnamasyna ózgeris engizý jóninde baǵdarlamalyq qujattar ázirleýmen aınalysqan. Ol baǵdarlamalyq qujattar Tóleshevtiń kómekshisi tasyǵan kompıýterinen jáne onyń jeke kabınetinen tabyldy. Tóleshev óziniń jekemenshik balamaly úkimetine tartamyn degen jekelegen adamdarmen aradaǵy telefon áńgimelerin qujatqa túsirý de aıaqtaldy»,-dep habarlady R. Qarasev.
Ulttyq qaýipsizdik komıtetiniń aıtýynsha, qylmys álemindegi halyqaralyq toptardyń aldynda bul oıǵa ábden bekingenin kórsetý úshin T. Tóleshev 2015 jyldyń tamyzynda ákesiniń týǵan kúnin jamylyp, Ońtústik Qazaqstan oblysynda aýqymdy áskerı-sporttyq sharalar ótkizgen. Osy sátter túsirilgen boljamdy beıne jelide júr. «Ákesiniń týǵan kúnine» arnalǵan sharaǵa T. Tóleshev shtattaǵy áskerılerdi, aýyr áskerı tehnıka men QR Qorǵanys mınıstrliginiń «Ońtústik» aımaqtyq basqarýynyń áskerı bólimindegi úsh áskerı ushaqty jumyldyra alǵan.
«T.Tóleshevtiń arnaıy shaqyrýymen osy sharaǵa sheteldik jekmenshik áskerı kompanııalar kelip, oqqaǵarlyq qabiletterin pash etken»,-dep habarlady R. Qarasev.
