T.Tóleshev qylmys álemindegi «dostarynyń» arqasynda Ózbekstanda úsh kásiporyndy ıelengen
ASTANA. QazAqparat - Qazaqstan Respýblıkasy Ulttyq qaýipsizdik komıteti baspasóz qyzmetiniń ókili Rýslan Qarasev Shymkent syra zaýytynyń burynǵy ıesi Toqtar Tóleshevtiń taǵy qandaı aktıvteri bar ekenin jarııa etti.
Buǵan deıin habarlaǵanymyzdaı, T. Tóleshev halyqaralyq deńgeıde tanymal Aslan Ýsoıanmen, «Tashkenttiń Jorasy» degen laqap aty bar Georgıı Sorokınmen, «Mernyı Gafýr» atty laqap aty bar Gafýr Arslanbek Rahımovpen, «Býhar Maksım» atty laqap aty bar Nozın Jumaevpen, «Ilıas kóke» atty laqap atymen tanymal Ilıas Sultanovpen tyǵyz baılanysta bolǵan. Osylardyń arasynda Gafýr Rahımov pen Nozın Jumaev Toqtar Tóleshevke Ózbekstandaǵy birneshe kásiporyndy baǵyndyryp bergen eken.
«Rahımov pen Jumaevtyń tikeleı kómeginiń arqasynda Toqtar Tóleshev Ózbekstanda birneshe kommertsııalyq nysandardy ózine qaratyp alǵan. Atap aıtsaq, T. Tóleshev «Shabyt» qonaqúıin, lak boıaýlaryn shyǵaratyn zaýyt pen «Lázzat» atty kondıterlik fabrıkaǵa ıelik etken. Sondaı-aq, Ózbekpromqurylys bankiniń iri aktsıoneri atanǵan»,- dep habarlady R. Qarasev.
Qazaqstan boıynsha Toqtar Tóleshev «Shymkentsyra» JShS zaýytynyń jaı ǵana dırektory emes, basqa birneshe iri nysandardyń da ıesi bolǵan.
R. Qarasevtiń aıtýynsha, T. Tóleshev shyny zaýyty, Ońtústik Qazaqstan agrarlyq odaǵy men «Shymkent pıkchers» kınostýdııasy jáne ózge birneshe kásiporyn kiretin «Darhan» atty iri holdıngtiń ıesi jáne jetekshisi bolǵan. Bul holdıngtiń Reseıde, Qyrǵyzstan men Tájikstanda fılıaldary bar bolyp shyqty.
