T. Tóleshev bılikti basyp alý úshin 90 qarýly ásker daıyndaǵan
ASTANA. QazAqparat - Memlekette tóńkeris jasaýǵa árekettengen burynǵy bıznesmen Toqtar Tóleshev 90 qarýly áskerdi jan-jaqty daıyndyqtan ótkizgen. Bul týraly búgin Ulttyq qaýipsizdik komıteti baspasóz qyzmetiniń ókili Rýslan Qarasev málim etti.
Rýslan Qarasevtiń aıtýynsha, Tóleshev ózimen sybaılas transulttyq qylmystyq toptardyń qatysýymen Shymkent aýmaǵynda birneshe ret jıyn ótkizgen. Olarǵa jıyn ótkizip bergen T. Tóleshev Ońtústik Qazaqstan oblysynyń qylmystyq toptary arasynda bedel jınap, krımınaldy máselelerdi «rettegeni» úshin aqsha alyp otyrǵan.
«Tergeý anyqtaǵandaı, qylmystyq ambıtsııasyn júzege asyryp, bedelin arttyra túsý úshin T. Tóleshev óz kásiporyndarynyń kúzet qyzmeti bazasynda óziniń uıymdasqan qylmystyq tobyn quryp, qarýmen jaraqtandyrǵan. T. Tóleshevtiń ıeliginde saqadaı-saı 90 áskeri bar bolǵan»,-dedi R.Qarasev.
Onyń aıtýynsha, T. Tóleshev óziniń bul áreketterine syrttaı zańdy kórinis berý úshin aldymen «SMERSh», keıinnen «Vympel grýpp» atty kúzet fırmasyn tirkegen.
