T. Temenov jas dramatýrgter nelikten az ekenin túsindirdi
ASTANA. QazAqparat - Jas dramatýrgter pesa emes, klıpterge stsenarıı jazǵandy jón kóredi. Búgin Ortalyq kommýnıkatsııalar qyzmetindegi baspasóz máslıhatynda Q.Qýanyshbaev atyndaǵy memlekettik akademııalyq qazaq mýzykalyq drama teatrynyń kórkemdik jetekshisi Talǵat Temenov osylaı málim etti.
«Ókinishtisi, búginde 30 jasqa deıin dúrildep shyqqan jas dramatýrgter joqtyń qasy. Sebebi, pesaǵa tólenetin qalamaqy basqa salalardan áldeqaıda az. Mysaly, keńestik kezeńde árbir pesaǵa beriletin qalamaqy bir mashınanyń quny bolatyn. Búginde az tólenedi», - dep toqtaldy Talǵat Temenov.
Onyń sózine qaraǵanda, qazirgi kezde jas daryndar aılap otyryp pesa jazyp, tıyn-teben alǵansha, basqa baǵyttarda baqtaryn synaǵandy jón kóredi.
«Bir klıpke úsh bettik stsenarıı jazsa, oǵan 10 myń AQSh dollaryna deıin alady. Sondyqtan osy másele áli de sheshimin tappaı júr. Árıne, T. Júrgenov atyndaǵy qazaq ulttyq óner akademııasynda, Astanadaǵy qazaq ulttyq óner ýnıversıtetinde dramatýrgterdi daıyndaıtyn mamandyqtar bar. Bul oqý oryndarynda múıizi qaraǵaıdaı dramatýrgter sabaq beredi. Biraq, sol dramatýrgterdiń sahnaǵa pesa ákelip, qoıyp jatqandary saýsaqpen sanarlyq. Árıne, jas talanttardyń, jas dramatýrgterdiń, jas rejısserlerdiń kelgenin qalaımyz»,-dedi ol.
Bul rette T. Temenov jas talanttar negizinen televızııa salasyna qyzmetke baratynyn, osy salada búginde kóptegen jaqsy dramatýrgter júrgenin atap ótti.
