«Túrkistan» halyqaralyq gazetiniń jınaǵy shyqty
Atalǵan sharaǵa elimizge belgili qoǵam qaıretkerleri, baspasóz salasynyń maıtalmandary qatysty. Atap aıtsaq, L.Gýmılev atyndaǵy EUÝ Jýrnalıstıka jáne saıasattaný fakýltetiniń dekany Qaırat Saq, fılologııa ǵylymdarynyń doktory, professor Serik Negımov, «Bas redaktorlar kýlbynyń» orynbasarlary, Qazaqstan ulttyq jaratylystaný ǵylymdary akademııasynyń vıtse-prezıdenti Kárimbek Qurmanáli, «Ádilet. Rýhanı jańǵyrý» gazetiniń bas redaktory Muratbek Toqtaǵazın, «Sakhara» respýblıkalyq qoǵamdyq-saıası gazeti bas redaktorynyń orynbasary Kenjebolat Joldybaı, «Otandastar qory» KEAQ-nyń resmı ókili, jýrnalıst Erkin Baıǵabyluly, Qazaqstan Jazýshylar odaǵynyń Nur-Sultan qalalyq fılıalynyń tóraǵasy, aqyn Dáýletkereı Kápuly, «Egemen Qazaqstan» gazeti Basqarma tóraǵasynyń orynbasary Erbolat Qamenov, Ulttyq akademııalyq kitaphanasynyń dırektory Úmithan Muńalbaeva jáne fılıologııa ǵylymdarynyń kandıdaty, dotsent Gúlmıra Áshirbekova qatysyp, jaryq kórgen jınaqqa oń baǵasyn berdi.
Qazaqstannyń Halyq jazýshysy Qaltaı Muhamedjanov negizin qalaǵan «Túrkistan» halyqaralyq gazeti 1994 jylǵy 28 qańtardan bastap shyǵa bastady. Sol ýaqyttan beri basylym betinde saıası-qoǵamdyq, tarıhı-tanymdyq, rýhanı, mádenı taqyryptardaǵy saraptamalyq maqalalar, oramdy oılar men parasatty paıym-pikirler úzbeı jarııalanyp keledi. Ásirese, týysqan túrki tildes halyqtardyń yntymaqtastyǵy men alys-jýyqtaǵy qandastar máselesi de nazardan tys qalǵan emes. Eldik sıpaty jaǵynan ózindik baǵyty anyq qalyptasqan, qazaq baspasózinde orny bar basylym Táýelsizdik jyldarynyń árbir eleýli oqıǵasyn turaqty jazylyp keledi.
«El Táýelsizdigin nyǵaıtýda qazaq baspasóziniń de qosqan úlesi zor. Sonyń ishinide halyqaralyq Túrkistan gazetiniń orny erekshe. Az jyldyń ishinde tek elimiz ǵana emes, kúlli túrki tildes halyqtardyń yntymaqtastyǵynyń únjarııasyna aınaldy. Al búgingi tusaýy kesilip otyrǵan jınaq qalyń oqyrmanǵa rýhanı azyq bolsa, qazaq baspasózin zertteýshilerge jáne jýrnalıstıkanyń oqýyna endi túsken jas túlekter úshin taptyrmas qural. Mundaı jınaqty jaı gazet shyǵara almaıdy. Tek irgeli basylymdardyń múmkindigi jetetin dúnıe», – dedi L.Gýmılev atyndaǵy EUÝ Jýrnalıstıka jáne saıasattaný fakýltetiniń dekany Qaırat Saq.
Sonymen qatar fılıologııa ǵylymdarynyń kandıtaty, dotsent Gúlmıra Áshirbekova basylym jaıly aranıy ǵylymı baıandama jasady. Sharaǵa zııaly qaýym ókilderimen birge L.Gýmılev atyndaǵy Eýrazııa ulttyq ýnıvesıteti Jýrnalıstıka jáne saıasattaný fakýltetiniń stýdentteri de qatysty.
«Táýelsizdik jyldarynda «Túrkistan» gazetiniń kótergen júgi mol. Qazir saraptamalyq materıaldary osy gazetten kóp oqımyn. Ásirese, álemniń ár túkpirinde júrgen qazaqtar jaıly shyqqan óte qyzyqty suhbattardy oqyp, rıza boldym. Sonymen qatar «ATAJURT» jobasyn aıyryqsha aıtýǵa bolady. Bul – joba elimizdiń ulttyq demografııasy úshin asa qajetti bastama», – dedi «Bas redaktorlar klýbynyń» vıtse-prezıdenti , «Sakhara» respýblıkalyq qoǵamdyq-saıası gazeti bas redaktorynyń orynbasary Kenjebolat Joldybaı.
«Túrkistan» halyqaralyq gazetiniń jınaǵyna Táýelsizdik jyldary basylym betinde jarııalanǵan tańdaýly materıaldar iriktelip engizilgen. Eldik birlikke, ulttyq tutastyqqa úndeıtin súbeli maqala, suhbattar toptastyrylǵan kitap el Táýelsizdiginiń shejiresi ispetti.
