T.Nárikbaev zańgerler qaýymyn Qazaqstandaǵy reformalarǵa belsendi aralasýǵa shaqyrdy

ASTANA. QazAqparat - Jahandyq ekonomıkadaǵy ahýal bizdi qol qýsyryp otyrmaýǵa, naqty isterge kóshýge ıtermeleıdi. Bul týraly búgin Astanada «Jańa jahandyq naqty ahýal jaǵdaıyndaǵy myqty jáne tabysty memleketti qalyptastyrý máseleleri» atty ǵylymı konferentsııada «Qazaq gýmanıtarlyq-zań ýnıversıteti» AQ rektory Talǵat Nárikbaev málim etti.

Onyń pikirinshe, álemdik ekonomıkalardyń jahandanýy kezeńinde, tıimdi, qısyndy usynystardy jasaqtaý óte úlken mańyzǵa ıe bolyp otyr.

«Jahandyq ekonomıkadaǵy, álemdegi ahýal bizdi qol qýsyryp otyrmaýǵa, naqty isterge kóshýge ıtermeleıdi. Birinshi kezekte bul bizdiń memleketke qatysty. Memleket qazir qoldan kelgenniń barlyǵyn jasap  jatyr. Memleket Basshysy «Qazaqstan-2050» baǵdarlamasyn, sonymen qatar 5 ınstıtýtsıonaldy reformany qabyldady. Biraq zańger qaýymnyń qatysýynsyz bul josparlardy, baǵdarlamalardy júzege asyrý qıyn. Sondyqtan biz óz tarapymyzdan memlekettiń shaqyrýyn kútpeı, zertteýler júrgizip, memleketke aldymyzda turǵan máseleler boıynsha tushymdy usynystar engizýimiz kerek. Sebebi qazir ýaqyt sondaı, barlyǵymyz birlesip, memleketke, Elbasyna, Úkimetke, bizdiń eldiń ekonomıkasymen aınalysyp jatqan barlyq adamdarǵa óz kómekterimizdi berýimiz kerek», - dep atap ótti T. Nárikbaev.   

Konferentsııanyń basty maqsaty - memleketti nyǵaıtýdyń praktıkalyq jáne teorııalyq máselelerin talqylaý.

Konferentsııa barysynda memlekettik organdardyń, Astana qalasynyń JOO professorlyq-oqytýshylyq quramy ókilderiniń, sonymen qatar shetel jáne Qazaqstan professsorlary baıandama jasaıdy dep kútilýde. Baıandamalar qorytyndysy boıynsha materıaldardyń jınaǵyn basyp shyǵarý kózdelgen.