T.Musabaev «Qazǵarysh» ujymyn tól merekelerimen quttyqtady
Jıynda Qazǵarysh tóraǵasy Talǵat Musabaev Agenttik pen onyń qaramaǵyndaǵy uıymdardyń 5 jylda atqarǵan qyzmetiniń negizgi nátıjeleri týraly baıandama jasap, agenttik ujymyn atalmysh ataýly merekelerimen quttyqtady.
Vedomstvo basshysy Astanada ǵarysh spýtnıgin qurastyratyn jáne synaıtyn keshen salynyp jatqandyǵyn málim etti. «5-6 jyldan keıin ol keshende qazaqstandyq spýtnıkterdiń jańa legi shyǵaryla bastaıdy», - dep atap ótti ol.
Sonymen qatar T.Musabaev búgingi tańda «QazSat-3» jerserigin qurastyrý jumystary júrgizililip jatqandyǵyn jáne spýtnıkterdi jerden basqarý kesheniniń qurylysy aıaqtalýǵa jaqyn ekendigin málim etti. Jáne bul agenttiktiń jetken tolaǵaı tabysynyń bir bóligi ǵana.
«Qazǵarysh» - memlekettik basqarý organdarynyń tobyna sátti kirigip, elimizdiń ǵaryshtyq qyzmeti salasynda tıimdi saıasat júrgizýde. Álemniń ǵarysh derjavalary bizdiń bul jetistikterimizdi joǵary baǵalaýda jáne Qazaqstanmen beıbit maqsatta ǵarysh keńistigin ıgerý salasynda tyǵyz qarym-qatynas jasaýǵa nıet tanytyp otyr. Bizdiń maqsatymyz - atalmysh jemisti isimizdi odan ári belsendi júrgizý jáne Elbasynyń aldymyzǵa qoıǵan mindetterin aqtaý. Sizderdi shyn júrekten Adamzattyń ǵaryshqa ushýynyń halyqaralyq kúnimen jáne Ulttyq ǵarysh agenttiginiń qurylǵanyna 5 jyl tolýymen quttyqtaýǵa ruqsat etińizder. Táýelsiz Qazaqstannyń ǵarysh salasyn qalyptastyrýda shyǵarmashylyq tabystar tileımin!», - dep túıindedi sózin agenttik tóraǵasy.
