T.Musabaev baıqońyrlyqtardy ǵarysh kúnimen quttyqtady
«Baıqońyr» ǵarysh kesheni turǵyndary men qyzmetkerlerin qazaqstandyqtardyń atynan QR Prezıdentiniń keńesshisi, ushqysh-ǵaryshker Talǵat Musabaev, Qazǵarysh tóraǵasynyń mindetin atqarýshy Erkin Shaımaǵambetov jáne Baıqońyr qalasynyń qurmetti azamaty, Qazǵarysh tóraǵasynyń orynbasary Erǵazy Nurǵalıev quttyqtady.
QR Prezıdentiniń keńesshisi Talǵat Musabaev óz quttyqtaýynda álemdik ǵaryshtyń besigine aınalǵan «Baıqońyr» ǵarysh keshenin birlesip paıdalaný Qazaqstan men Reseı arasyndaǵy yntymaqtastyqtyń mańyzdy baǵyttarynyń biri bolyp otyrǵandyǵyn atap ótken.
«Kez kelgen ǵaryshqa ushýdy júzege asyrý jáne onyń tabysty oryndalýy jerdegi daıyndyq jumystaryna, «Baıqońyr» ǵarysh aılaǵynyń jerústi ınfraqurylymy mamandarynyń qajyrly eńbegine, ǵarysh salasynyń barlyq qyzmetkerlerine baılanysty ekendigi eshkimge de qupııa emes. Osynaý mereke kúninde qyzmeti ǵaryshty ıgerýmen baılanysty barlyq mamandardy quttyqtaımyn. Sizderdiń jumystaryńyz - bul bizdiń bolashaq urpaqqa tabystaıtyn zamanaýı ǵylym men ınnovatsııaǵa, aldyńǵy qatarly tehnologııalardy damytýǵa qosqan úles», - delingen quttyqtaýda.
«Qazǵarysh» baspasóz qyzmeti aqparatyna qaraǵanda, Talǵat Musabaev pen Erkin Shaımaǵambetov «Reseıǵarysh» memlekettik korporatsııasynyń shaqyrýymen adamzat balasynyń ǵaryshqa alǵash ushýynyń 55 jyldyǵyna arnalǵan Kremldegi saltanatty jıynǵa qatysý úshin Máskeýde júr. 
