T. Qulyıastyń “Qan josa ǵasyr”, “Qyrǵyn”, “Qan keshý” atty tarıhı-zertteý jınaqtary tanystyryldy
ASTANA. 23 aqpan. QazAqparat /Jasulan Amanbaıuly/ - Astanada jazýshy Tabyl Qulyıastyń "Qanjosa ǵasyr", "Qyrǵyn", "Qan keshý" atty kitaptarynyń tanystyrylymy ótti.
Satıra-ıýmor janrynda esimi tanymal T. Qulyıas sońǵy jyldary muraǵat, murajaılardaǵy tarıhı derekterdi zerttep tarıhı shyǵarmalarǵa bet burǵany belgili. Qazaqstan táýelsizdiginiń 20 jyldyǵyna oraı jaryqqa shyqqan atalmysh týyndylary qazaq dalasynda qasaqana jasalǵan saıası qýǵyn-súrgin men ashtyq náýbeti, 1918-1932 jyldar kezeńinde qazaq halqy bastan keshken jáıtter baıan etiledi.
Kitaptyń úsheýi de Keńes Úkimeti tusyndaǵy tragedııalyq oqıǵalarǵa, qoldan jasalǵan saıası náýbetterge arnalǵan. Máselen «Qan josa ǵasyr» kitabynda 1918-1922 jyldardaǵy ashtyqtyń sebepteri baıandalsa, «Qyrǵyn» kitabynda 1932-1934 jyldary F. Goloşekınniń «Kishi Qazan» ujymdastyrý saıasaty jáne onyń qazaq halqy úshin orny tolmas saldarlary, «Qan keshý» jınaǵynda NKVD-niń ult zııalylary men bas kóterer azamattardyń sońyna túsip, qýǵyn-súrginge ushyratyp, ǵazız ómirlerin jalmaǵan aýyr jyldar sýretteledi.
«Qazaqstanǵa qatysty muraǵat qujattarynyń basym bóligi Reseı jerinde. Aryp-ashysaq ta «bóri aryqtyǵyn bildirmeıdi» dep, tirnektep jınap, myna úsh kitapty shyǵaryp aldym. Qazaq halqynyń basynan talaı qıyndyqtar ótti. Kóptegen tarıhı qujattar áli ashylmaı jatyr. Ásirese 1918 jylǵy ashtyq eshbir kitapta, BAQ betterinde kóringen joq», - deıdi avtor.
Jazýshy kitap shyǵarý barysynda Birlesken memlekettik saıası basqarmasynyń jáne Іshki ister Halyq Komıssarıatynyń qupııa qujattaryn, sonymen birge Orynbor, Or, Barnaýyl, Kemer qalalarynyń muraǵattaryndaǵy qujattardy paıdalanǵan.
