T.Qulybaevqa qatysty buryn shyǵarylǵan sheshimdi buzyp, qosymsha tergeý amaldaryn júrgizýge eshqandaı negiz joq - Bas prokýratýra
ASTANA. 20 jeltoqsan. QazAqparat /Aıdar Ospanalıev/ - Bas prokýratýra bir top azamattardyń Tımýr Qulybaevqa qatysty Shveıtsarııa Konfederatsııasynyń Bas prokýratýrasy bastaǵan qylmystyq isti tergeý jumystaryna atsalysý jónindegi ótinishterin qarady.
Búgin jýrnalıstermen kezdesken Bas prokýratýranyń resmı ókili Jandos Ómirálıevtiń sózine qaraǵanda, bul másele boıynsha elimizdiń qarjy polıtsııasy organdary osyǵan deıin de tergeý jumystaryn júrgizgen. Alaıda Tımýr Qulybaevtyń da jáne odan ózge azamattardyń da áreketterinde qylmystyń belgileri bolmaýyna baılanysty qylmystyq is qozǵaýǵa tyıym salynǵan.
«Al ótinishte aldynda tekserilgennen ózge qosymsha dálelder men dáıekter keltirilmegen. Sondyqtan buryn shyǵarylǵan sheshimdi buzyp, qosymsha tergeý amaldaryn júrgizýge eshqandaı negiz joq. Al T.Qulybaevqa qatysty Shveıtsarııanyń quqyq qorǵaý organdary tarapynan qylmystyq isti izdestirý jumystary bastaldy degen máselege keletin bolsaq, búgingi kúnge deıin Shveıtsarııany qosa alǵanda eshqandaı da shet memleketterdiń quqyq qorǵaý organdarynan qandaı da bir qylmystyq is boıynsha suraý salynǵan joq. ıAǵnı T.Qulybaevqa qatysty qylmystyq is qozǵaý máselesi resmı rastalǵan joq», - dedi resmı ókil.
Onyń aıtýynsha, Eýropa elderindegi qylmystyq izdestirý tájirıbeleri bizdikimen salystyrǵanda áldeqaıda bólek. «Mysaly, bizde quqyq qorǵaý organdaryna kelip túsken aryz boıynsha aldymen tekserý júrgiziledi. Osy tekserýler barysynda qandaı da bir negiz bolsa ǵana qylmystyq is qozǵalady. Al Shveıtsarııa zańdary boıynsha quzyrly organǵa aryz túsken ýaqyttan bastap, qylmystyq is qozǵala beredi. Sondyqtan da olarda qozǵalǵan isterdiń 80 paıyzy toqtatylyp jatady. Osy sebepti T.Qulybaevqa qatysty sheteldikter qylmystyq isti qozǵady eken dep qandaı da bir baılam jasaýǵa bolmaıdy. Buny ótinish bildirgen azamattarǵa berilgen resmı túrdegi jaýap dep túsingen jón», - dedi Jandos Ómirálıev.
