T. Qulybaev: KAZENERGY qaýymdastyǵy QR Úkimetimen barlyq máseleler boıynsha tyǵyz baılanys ornatýǵa daıyn

ASTANA. QazAqparat - KAZENERGY qaýymdastyǵy árdaıym QR Úkimetimen tyǵyz qarym-qatynasta bolýǵa daıyn. Bul týraly «KAZENERGY» qaýymdastyǵynyń tóraǵasy Tımýr Qulybaev málim etti.

«Búgin Energetıka mınıstrligimen kelisim jasaldy. Biz belsendi ári tyǵyz jumys jasap keldik. Shkolnık myrza qaýymdastyqtyń barlyq jumystaryna qatysyp kele jatyr jáne onyń isin búge-shigesine deıin biledi», - dedi T. Qulybaev «KAZENERGY» qaýymdastyǵy jáne QR Energetıka mınıstrligi arasyndaǵy yntymaqtastyq týraly kelisimge qol qoıý barysynda.

Onyń sózine qaraǵanda, qaýymdastyqtyń quramynda qazaqstandyq jáne halyqaralyq mamandar jumys jasaýda. Sonyń arqasynda Kazenergy qaýymdastyǵynyń ózine tán joǵary deńgeıdegi saraptamasy qalyptasyp úlgerdi.

«Kelesi jyly bizge 10 jyl tolady. Osy jyl aralyǵynda qaýymdastyq músheleri arasyndaǵy ózara qarym-qatynas jolǵa qoıyldy, sarapshylyq áleýet tartylyp, túrli máseleler joǵary deńgeıde kóterilýde. Aıtaıyn degenim KAZENERGY QR Úkimetimen barlyq máseleler boıynsha tyǵyz baılanys ornatýǵa daıyn», - dep atap ótti ol.