T. Dúısenova jáne farmatsevtıkalyq qaýymdastyqtar basshylary dári-dármektiń baǵasyn kótermeý týraly qujatty bekitti
Memorandým halyqtyń áleýmettik qaýqarsyz toptaryn qoldaýǵa baǵyttalyp otyr. Qujat aıasyndaǵy sharalar 2016 jyldyń sońyna deıin júzege asyrylady. Tizimdegi dárilerdiń arasynda qabynýǵa qarsy, aýyrsynýdy basatyn preparattar, júrek, asqazan aýrýlaryna qarsy, sonymen birge antıgıstamındi, gıpotenzıvti dáriler bar, sondaı-aq kóz jáne qulaq tamshylary, dárýmender jáne basqa da dári-dármek túrleri kiredi.
Qol qoıý rásimenen keıin T. Dúısenova qaýymdastyq basshylaryna alǵys hattar tabystady.
«Densaýlyq saqtaý jáne áleýmettik damý mınıstrligi dárilik qamtamasyz etýge qatysqandaryńyzǵa, qoǵamdaǵy áleýmettik mańyzy bar máselelerdi sheshýde, memlekettik organdarmen ózara is-qımyldar úshin, dárilik zattarǵa baǵanyń ósýine jol bermeýge járdemdeskeni úshin alǵysyn bildiredi», - dep atap ótti mınıstr.
Aıta keteıik, atalǵan qujatqa Farmatsevtıkalyq qyzmetti qoldaý jáne damytý qaýymdastyǵynyń prezıdenti Marına Dýrmanova, «Qazaqstannyń FarmMedIndýstrııasy» qaýymdastyǵynyń prezıdenti Serik Sultanov, «Qazaqstan Respýblıkasy Halyqaralyq farmatsevtıkalyq óndirýshileri» qaýymdastyǵynyń prezıdenti Vıacheslav Lokshın, «Qazaqstan Respýblıkasy Farmatsevtıkalyq ónim dıstrıbıýtorlary» qaýymdastyǵynyń atqarýshy dırektory Natalıa Gýnko qol qoıdy.