T.Bıgeldınov atyndaǵy Áskerı ınstıtýt kýrsanttary ushaq basqarýdy úırendi
AQTÓBE. QazAqparat - T.Bıgeldınov atyndaǵy Áýe qorǵanysy kúshteriniń Áskerı ınstıtýt kýrsanttary ushaq basqarýdy úırendi, dep habarlaıdy QazAqparat tilshisi.
Aqtóbeniń «Hlebodarovka» aerodromynda Áskerı ınstıtýt kýrsanttary tájirıbe jınaqtady. Barlyǵy 24 kýrsant jyl boıy alǵan teorııalyq bilimin jetildirip, emtıhan tapsyrdy, dárigerlik komıssııadan ótti. Negizi áskerı avıatsııa fakýltetindegi ushý tájirıbesi mamyr aıynda bastalyp, jaz boıy jalǵasady. Al aerodromda Mı-8 tikushaǵy daıyn. Baǵdarlama boıynsha kýrsant ınstrýktormen birge áýege kóterilip, arnaıy marshrýtpen júrip ótedi.
«Tikushaqty basqarmas buryn teorııalyq bilim alamyz. Jerde áýedegi árbir element muqııat zerdelenedi. Sonymen qatar tótenshe jaǵdaıdaǵy is-qımyl úıretiledi. Áýede usaq-túıek bolmaıdy. Tishushaq áýege kóterilse bári ózgeredi. Sondyqtan ushqyshtar arasynda aspan bir baldy shegeredi degen túsinik bar. Eger jerde úzdik oqysa, áýede «jaqsy» degen baǵa alady», - dedi ınstıtýttyń oqý ortalyǵy komandıriniń orynbasary Vadım Chýbachýk. 
Instıtýtyń kýrsanty Baýyrjan Sabyrbaev 50 saǵat áýede ushty. Onyń 20 saǵattan astamyn ınstrýktormen ótkizse, 30 saǵaty ózine tıesili.
«Bala kúnimnen aspanǵa kóterilýdi armandadym. Ushqyshtar týraly kóp kitap oqyp, fılm qaradym, fızıka men matematıkany oqydym. Osy eki pánniń mańyzdy ekenin bildim. Meniń alǵashqy nusqaýshym ákem boldy. Ol qazir zapastaǵy polkovnık», - dedi Baýyrjan Sabyrbaev.
Kýrsanttar úshin ınstrýktormen ótetin 20 saǵat mańyzdy. Osy ýaqyt aralyǵynda kýrsanttyń áýege jalǵyz kóterilýine bolatyny nemese bolmaıtyny sheshiledi. 
«Tájirıbede eki jaǵdaı boldy. Eki jaǵdaıda da kýrsantqa qosymsha saǵat berilip, sóılestik. Nátıjesinde eki kýrsantty da basqa fakýltetke aýystyrýǵa týra keldi. Sebebi, áýe qatelikti keshirmeıdi», - dedi oqý-avıatsııa ortalyǵynyń bastyǵy Nurbol Sálimbaev.
Áýe qorǵanysy kúshteri Áskerı ınstıtýtynyń baspasóz qyzmetinen habarlaǵandaı, 24 kýrsanttyń bári emtıhannan sátti ótti.
