T.Bekmambetov: Ekshn-fılmderdiń kınofestıvali qarqyndy damyp kele jatqan Astana sııaqty qalada ǵana ótýi múmkin

Bul pikirin búgin Ekshn-fılmderdiń «Astana» ІІ halyqaralyq festıvaliniń ashylýyna oraı ótken baspasóz máslıhatynda festıval prezıdenti, rejısser Tımýr Bekmambetov aıtty.

Astana kúnin merekeleý aıasynda byltyr alǵash ret ótkizilgen Tımýr Bekmambetovtyń ekshn-fılmderdiń halyqaralyq festıvali bıyl kezekti ret shymyldyǵyn ashqaly otyr. Bıyl «ASTANA» atty halyqaralyq festıvaldiń qyzyl kilemi Beıbitshilik jáne kelisim saraıynyń aldyna tóseldi. Onymen búgin keshqurym Gollıvýdtyń belgili kıno juldyzdary Stıven Sıgal, Mıshel Rodrıgez, Maıkl Mendsen jáne Armand Assante, reseılik taraptan Dmıtrıı Nagıev, Nıkolaı Valýev, Marat Basharov, Egor Konchalovskıı, Sergeı Svetlakov, Gosha Kýtsenko, Ekaterına Strıjenova, Vıktor Verjbıtskıı sondaı-aq, qazaqstandyq taraptan Dosqan Joljaqsynov, Asanáli Áshimov, Venera Nyǵmatýlına, Erik Joljaqsynov, Farhat Ábdraımov, Ásel Saǵatova, Ámir Qaraqulov, Ahan Sataev, Igor Vovnıanko jáne Ardaq Ámirqulov júrip ótedi. Odan keıin «Pıramıdada» Ekshn-fılmderdiń «ASTANA» ІІ halyqaralyq festıvaliniń saltanatty jaǵdaıda ashylýy bolady.

«Ekshn-fılmderdiń kınofestıvali qarqyndy damyp kele jatqan Astana sııaqty qalada ǵana ótýi múmkin. Ony biz qala basshylyǵynyń uıytqy bolýymen uıymdastyryp otyrmyz jáne olardyń qyzý qoldaýlarynyń arqasynda, qalaǵa mereke syılaý nıetteriniń arqasynda festıvaldiń ǵumyry uzaq bolady dep senemin», - dedi T.Bekmambetov.

T.Bekmambetovtyń aıtýynsha, 1-5 shilde aralyǵynda ótetin festıval barysynda kórsetiletin kartınalardyń sherýi qazaqstandyq úsh fılmmen bastalady. Onyń biri Egor Konchalovskııdiń «Qazaqfılm» kınostýdııasynda túsirilgen «Vozvraşenıe v A» atty fılmi bolsa, ekinshisi reseılik akter Dmıtrıı Nagıevtiń qatysýymen túsirilgen Denıs Kýklın men Lev Marıýpolskııdiń «Dva pıstoleta» fılmi. Al úshinshi kartınany uıymdastyrýshylar tosynsyı retinde qupııada qaldyrdy. Aıta keteıik, festıvalda qazaqstandyq kınolenta alǵashqy ret 3D formatynda kórsetiletin bolady. Festıvaldi Kemeron Dıaz pen Djastın Tımberleıktiń basty rólderdi somdaýyndaǵy «Ochen plohaıa ýchılka» komedııasy aıaqtaıdy dep kútilýde. Kınosúıer qaýymnyń nazaryna barlyǵy 21 fılm usynylmaq.