T.Bekmambetov: Aqsha quıylar salasyn ózi izdeıdi

«Álemdik naryqqa shyǵý úshin kóp jumys isteý qajet»

- Siz qyrkúıek aıynda ózińizdiń «Hardkor» atty atys-shabys janryndaǵy fılmińizdiń álemdik dıstrıbýtsııalaý quqyǵyn amerıkandyq STX Entertainment stýdııasyna reseılik kıno úshin teńdessiz somaǵa, 10 mln. dollarǵa sattyńyz. Munan bólek, olar fılmdi ilgeriletý úshin taǵy 20 mln. dollar quıady. Mundaı nátıjege qalaı qol jetkize aldyńyz?

- Iá, menińshe, mundaı kelisim buǵan deıin bolǵan emes. STX bizdiń shyǵyndarymyzdy jabýǵa jetkilikti somany tóledi. Fılmmen áli de jumystar júrgizilip jatyr jáne ol ázirshe prokatqa (AQSh-taǵy kórsetilimi 2016 jyldyń 8 sáýirine josparlanǵan) shyqpaıdy, shyǵystar jalǵasý ústinde. Olar sııaqty biz de fılmniń álemdik kórsetilimi barynsha tabysty bolady dep úmittenip otyrmyz.

Men úshin Torontoda ótken fılmniń premerasy («Hardkordyń» álemdik tusaýkeseri 2015 jyldyń 12 qyrkúıeginde ótti) barynsha mańyzdy boldy. Ilıa (fılmniń rejısseri Naıshýller) ekeýimiz taksımen kınoteatrge ketip bara jatqanymyzda kezekte turǵan halyqtyń qaraqurym ekendigin kórdik. Kezek búkil bir qala oramyn alyp, kınoteatrdyń aldyna deıin jetip jatty.

- Fılmniń bıýdjeti qansha?

- Joǵaryda atap ótkenimdeı STX-pen jasalǵan kelisimshart somasy barlyq mindettemeler men fılm bıýdjetiniń bir bóligin jabýǵa jetkilikti boldy. Negizinen «Hardkorge» túsken adamdardyń basym bóligi aqsha úshin jumys istegen joq. Óıtkeni, bul Ilıanyń alǵashqy fılmi jáne Bazelevs Production men Ilıanyń komandasy ıdeıa úshin jumys istedi.

- «Hardkor» syndy reseılik kınolardyń shetelde kórsetilýi jáne satyp alynýy úshin ne isteý kerek?

- Men kez kelgen fılmniń eń aldymen óz elinde kórsetilgeni durys ekendigine senimdimin. Degenmen, Frantsııadaǵy, Qytaıdaǵy, Amerıkadaǵy jáne Reseıdegi jastar bir-birine qatty uqsaıdy. Amerıkada óz kórermenin tapqan týyndy Reseıde de óz kórermenin erkin taba alady. Al álemdik naryqqa shyǵý úshin kóp jumys isteý qajet.

- Qıyn saıası ahýal Batysta sizdiń jumystaryńyzǵa áser etti me?

- Joq, eshqandaı áseri bolǵan emes. Qudaıǵa shúkir, Amerıkada adamdar syrtqy saıasatqa qatty qyzyǵýshylyq tanyta bermeıdi.

«Reseı kınosyna memlekettik qoldaý 2-3 fýtbolshynyń qunyna teń»

- Siz birde Reseıdiń Amerıkadan aıyrmashylyǵy is júzinde kıno ındýstrııasynyń joqtyǵynda, degen edińiz. Al onyń paıda bolýy úshin ne isteý qajet?

- Eń birinshiden, halyqaralyq sanattaǵy ıdeıalar qajet. Ekinshiden, erik-jiger men kóp aqsha, mol júıeli túrde qarjy kerek. Táýekelge baryp bir jaqsy fılm túsirýge jumsalǵan qarjy ındýstrııa qalyptastyrýǵa septigin tıgize almaıdy. uzaqmerzimdi ınvestıtsııa qajet.

Reseı kınosynyń taǵdyryna, kınematografııany qoldaý bıýdjetine arnalǵan kezdesýde tanymal saıasatkerlerdiń biri talqylanyp jatqan máseleniń quny eki fýtbolshynyń qunymen teńesetindigin aıtqan edi. Reseı kınosymen barlyq memlekettik qoldaýdyń kólemi reseılik klýbtar shaqyratyn 2-3 sheteldik fýtbolshynyń qunymen ǵana teń. Kınoda munan birshama mol qarjy bolýy tıis. Al ol tolyq oryndalǵan kezde kıno ındýstrııaǵa aınalyp, tek óz naryǵynda ǵana emes, sonymen birge «ózgeniń alańynda» da tabysty oıyn órnegin júrgize alar edi.

- Fılmderińizge aqshany qaıdan alasyz?

- Bastapqyda bizderge «Birinshi arnamen» yntymaqtastyq zor demeý boldy. «Sholǵynshy» jáne «Taǵdyr tálkegi» fılmderine bizdiń negizgi ınvestor ár seriktes boldy. Sál keıinirek Kıno qory zor kómek berdi. Kıno qory bastapqyda «Elkı» (2010-2014 jyldary «Elkı», «Elkı 2», «Elkı 3» jáne «Elkı 1914») fılmderin, odan keıin «Gorko!» (2013-2014 jyldary - «Gorko!» jáne «Gorko! 2») fılmderin túsirýge járdem berdi. biz bul fılmderdi túsirýge emes, olardy ilgeriletý úshin mol qarjy jumsadyq. Egerde Kıno qory bolmaǵan jaǵdaıda biz muny jasaı almaıtyn edik: fılmdi ilgeriletý úshin qajetti ınvestıtsııa bizdiń múmkinshigimizben múldem qıyspaıtyn. «Elkı» halyqtyń súıikti týyndylaryna aınalyp, bizdiń kásipornymyzdyń tiregi boldy. Túsken kiristi kelesi fılmdi qarjylandyrýǵa saldyq. Osylaısha óstik.

- Bir fılmnen túsken tabys kelsi týyndynyń búkil bıýdjetine jetkilikti bola ma?

- Ár ýaqytta da árqıly bolyp keledi. Jalpy, barlyq másele aqshada emes. Biz jobany qolǵa alǵan kezimizde tek aqsha ǵana emes, eń aldymen seriktes izdeımiz. Aqsha - bul ınvestıtsııa elementteriniń biri ǵana. Telearnalarmen jumys barysynda bizder úshn ınvestıtsııa emes, seriktestik barynsha mańyzdy.

«Elkıdiń» úshinshi fılmimen jumys isteý barysynda Anton Zlatopolskıı (VGTRK bas dırektorynyń birinshi orynbasary) VGTRK-niń tilshiler jelisi arqyly bizderge fılmniń aýqymdy aktsııasyn - Jańa jyldy jaz aıynda Ýfada, Permde, Almatyda, Kalınıngradta, Magnıtogorskide, Irkýtskide, Sankt-Peterborda, Vladıkavkaz ben Ekaterıbýrgte qarsy alýdy uıymdastyrdy. Bul fılmdi ilgeriletýdiń biregeı tetigine aınaldy. Aqshany bankten de tabýǵa bolady. Al seriktestik qarym-qatynas pen kıno bolashaǵyna degen senimdi satyp ala almaısyń.

Búginde biz ǵalamtordyń qarqyndy damýyna kýámiz. Áleýmettik jelilermen, ǵalamtor resýrstarmen seriktestiktiń mańyzy artyp keledi. Búginde biz RuTube jáne «VKontakte»-men jumys isteýdemiz. Olar bizdiń «Na ekrane» realıtı-shoýyndaǵy seriktesterimiz.

- Daǵdarys jumystaryńyzǵa qalaı áser etýde? Óıtkeni, telearnalardyń tabystary tómendedi. Endigi ýaqytta olar fılmge burynǵydaı qarjy sala almaıdy ǵoı.

- Reseıdegi tabysymyz aıtarlyqtaı tómendedi. Keminde 2 ese, tipti odan da kóp qysqarýy múmkin. Degenmen biz «Hardkor» men «On - Drakon» fılmderiniń halyqaralyq kórsetilimi tabysty bolady dep úmit artamyz. Al bul bizderge jaǵdaıdy teńestirýge septigin tıgizedi.

- Jobanyń óz shyǵynyn óteý turǵysynan alyp qaraǵanda, siz eń tabysty prodıýser ári rejıssersiz. shyǵarmashylyq pen kommertsııalyq tarıhty qalaı ushtastyra alasyz?

- Men bıznesmen emespin. Bizdiń kompanııamyz da bıznes kásiporyny emes. 20 jyldan beri jumys istep turǵan Bazelevs Production kompanııasynda bıznesmender emes shyǵarmashylyq adamdary qyzmet etedi. Olar yntalandyratyn eń basty kúsh - bul shyǵarmashylyq. Ádette bıznesmender bul protseske tek qyzmet qana kórsetedi. Eger talantty adamdar bolsa, olardyń ymyrasyz bastamalary bolsa onda aqshanyń ózdiginen tabylatyndyǵyna senimim mol. Aqsha quıylar salasyn ózi izdeıdi.