T.Balyqbaev: Ýnıversıtet ustazdarynyń jalaqysy óte tómen deńgeıde
ASTANA. 16 qańtar. QazAqparat - Qazaqstan joǵary oqý oryndary ustazdarynyń jalaqysy óte tómen deńgeıde qalyp otyr. Bul týraly búgin QR Parlamenti Májilisi Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Takır Balyqbaev aıtty.
Vıtse-mınıstrdiń sózine qaraǵanda, elimizde joǵary bilim berýdi qarjylandyrý 1999 jyly qabyldanǵan model negizinde júrgizilip keledi. Al ol búgingi tańda joǵary bilim sapasy men onyń básekege qabilettiligin arttyrýdaǵy jańa mindetterge saı emes.
«Osynyń nátıjesinde bizdiń oqytýshylardyń ortasha jalaqysy óte tómen deńgeıde. Búginde ol ortasha jalaqy 80 myń teńgeni quraıdy. Bul Ulybrıtanııa, AQSh-qa qaraǵanda 10 ese, basqa elderge qaraǵanda 3-5 ese tómen bolyp otyr», - dedi T.Balyqbaev.
Sondaı-aq ol óz sózinde JOO ınfraqurylymdarynyń eskirip, stýdentterdi jataqhanamen qamtamsyz etý 65 paıyzdy ǵana qurap otyrǵandyǵyn basa aıtty.
