T.Balyqbaev: UBT kezinde túlekterdi tintip, sheshindirý faktisi oryn alǵan joq
ASTANA. QazAqparat - Ulttyq biryńǵaı test kezinde túlekterdi tintip, sheshindirý faktisi oryn alǵan joq. Bul týraly búgin QR Bilim jáne ǵylym vıtse-mınıstri Tahır Balyqbaev málim etti.
«Qazirgi ýaqytta ata-analar prokýratýraǵa ótinish jazdy. Prokýratýra teksersin, bizdiń naqty deregimiz boıynsha balany tintigen, sheshindirgen fakti bolǵan joq. Biraq prokýratýra tolyq teksersin, sheshsin, sodan keıin sizderge nátıjesin aıtamyz», - dedi ol BAQ ókiliniń oqýshylardy UBT-ǵa kirerdi sheshindirip, tekserý faktisiniń oryn alýyna qatysty saýalyna.
Sonymen qatar vıtse-mınıstr jýrnalıstiń keıbir qyz balalardyń jylap, telearnalarǵa bergen suhbatyna qatysty da saýalyna jaýap berdi.
«Balalardyń nege jylaıtynyn bilesizder me? 99 ball alamyn degen bala 35 ball alǵan kezde jylaı beredi. Sondyqtan bul jerde balanyń emtıhan bitkennen keıin jylaǵany nátıjege baılanysty ma álde emtıhan aldynda bolǵan jaıtqa baılanysty ma ekendigin anyqtaý kerek. Teksersin, kórsin, bizdiń esh qarsylyǵymyz joq», - dedi T.Balyqbaev.
