T.Balyqbaev: Qazaqstanda kadrlardy daıyndaý eńbek naryǵynyń talaptaryna tolyq sáıkes kelmeıdi
ASTANA. 16 qańtar. QazAqparat - Qazaqstanda kadrlardy daıyndaý eńbek naryǵynyń talaptaryna tolyq sáıkes kelmeıdi. Bul týraly búgin QR Parlamenti Májilisi Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Takır Balyqbaev aıtty.
Álemdik aldyńǵy qatarly elderdegi joǵary bilim berýdiń búgingi tańdaǵy úrdisterine toqtalǵan ol: «Eń birinshi úrdis - ol jappaı bilim berý. Búgingi tańda ekonomıkalyq yntymaqtastyqty damytý elderinde jastardyń 27 paıyzy joǵary bilim alady. Qazaqstanda bul 24 paıyzǵa teń. Sońǵy jyldary álemde joǵary bilim alyp jatqan jastardyń sany kúrt ósti. Al bizde sońǵy on jyldyń ishinde 3 paıyzǵa tómendedi», - dedi T. Balyqbaev.
Vıtse-mınıstrdiń atap ótýinshe, ekinshi jaǵynan bilimdi jappaı berý jalpylama bolǵandyqtan bilim sapasyn tómendetedi. Osyǵan baılanysty bilim sapasynyń tómendeýi máselesi bar.
«Jalpy, Qazaqstanda kadrlardy daıyndaý eńbek naryǵynyń talaptaryna tolyq sáıkes kelmeıdi jáne joǵary oqý oryndaryn bitirýshilerdiń básekege qabilettiligin qamtamasyz etpeıdi. Osy baǵytta kelesi sharalardy usynyp otyrmyz. Birinshiden, mamandardy bıznes salalaryna sáıkes daıarlaý jáne onyń sapasyn arttyrý. Ol úshin bilim men bıznesti ıntegratsııalaýdy tereńdetemiz. Memleket basshysynyń tapsyrmasy boıynsha ekinshi kýrstan bastap óndiristik tájirıbeden ótkizý zańnamalyq turǵyda engizileıin dep jatyr», - dedi ol.
T.Balyqbaevtyń atap ótken ekinshi shara boıynsha joǵary oqý oryndarynyń básekege qabilettigin arttyrý úshin arnaıy baǵdarlamalar jasalady.
