T.Balyqbaev: Qazaqstan JOO-larynda ustazdardyń sapasyn kóterýge qarjy da, arnaıy baǵdarlama da joq
ASTANA. 16 qańtar. QazAqparat - Qazaqstan joǵary oqý oryndarynda ustazdardyń sapasyn kóterýge qarjy da, arnaıy baǵdarlama da joq deýge bolady. Bul týraly búgin QR Parlamenti Májilisi Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Takır Balyqbaev aıtty.
«Búgingi tańda, ókinishke oraı, bizdiń ýnıversıtetterde ustazdardyń sapasyn kóterýge qarjy da, arnaıy baǵdarlama da joq dep aıtýǵa bolady. Sol sebepti qazir ýnıversıtet basshylyqtarymen osy oqytýshylardyń sapasyn arttyrý úshin baǵdarlama jasap, qarjy bólsin degen usynysty engizbekpiz», - dedi T.Balyqbaev.
Sonymen qatar vıtse-mınıstr elimizdegi joǵary oqý oryndaryna derbestik berý máselesi qarastyrylyp jatqandyǵyn atap ótti.
«Álemdegi ýnıversıtetterdiń barlyǵy ár ýaqytta da avtonomııaly boldy. Búgingi tańda bizdegi ortalyqtandyrylǵan basqarý júıesi joǵary oqý oryndarynyń básekege qabilettiligine kishkene bolsa da kedergi keltirýde», - dedi ol.
