T. Aıbergenov shyǵarmashylyǵyna arnalǵan «Bir toıym bar» atalatyn án baıqaýy ótkiziledi
ASTANA. 22 maýsym. Qazaqparat - Sazgerler arasyndaǵy bul baıqaý T.Aıbergenov óleńderine jazylǵan ánder men aqynǵa arnap jazylǵan arnaý ánder atalymdary boıynsha ótkiziledi.
«Alash aınasy» gazetiniń jazýynsha, án baıqaýyna kásipqoı jáne áýesqoı sazgerler qatysa alady. Olardyń jas mólsheri shektelmeıdi. Usynylatyn ánder buryn-sońdy oryndalmaǵan jáne jarııalanbaǵan jańa shyǵarma bolýy tıis. Ánder kez kelgen janrda qabyldanady. Avtorlar eki atalymǵa da bir nemese birneshe shyǵarma jiberýine bolady. Úmitker óz týyndysyn CD + (daýyspen), CD - (daýyssyz) jazylǵan túrin, buǵan qosa eki dana ánniń notasyn, eki dana mátinin (basylymyn kórsetip) 15 tamyzǵa deıin «Aıbergenov álemi» jýrnalynyń redaktsııasyna joldaýy kerek. Jeńimpaz atanǵan shyǵarmalardyń oryndaýshylary týyndylaryn T.Aıbergenovtiń 75 jyldyǵyna arnalǵan «Bir toıym bar» degen sharada oryndaıdy.
Onda birinshi atalym boıynsha bas júldege - 500 myń, birinshi orynǵa - 300 myń, ekinshi orynǵa - 200 myń, úshinshi orynǵa - 100 myń teńge. Ekinshi atalym boıynsha birinshi orynǵa - 300 myń, ekinshi orynǵa - 200 myń, úshinshi orynǵa 100 myń teńge júlde taǵaıyndalyp otyr.
Uıymdastyrýshylar sondaı-aq T.Aıbergenov óleńderin mánerlep oqý boıynsha da mektep oqýshylary arasynda baıqaý jarııalap otyr. Onda birinshi orynǵa - noýtbýk, ekinshi orynǵa - teledıdar, úshinshi orynǵa - uıaly telefon jáne yntalandyrý júldesine DVD, MP3-player, fleshka taǵy basqa syılyqtar berilmek.
