Sizdiń zeınetaqyńyz qaıta esepteldi: Ulttyq bank qazaqstandyqtarǵa eskertý jasady

ASTANA. KAZINFORM – Ulttyq bank zamanaýı tsıfrlyq tehnologııalar men áleýmettik ınjenerııa ádisterin paıdalana otyryp, egde jastaǵy azamattarǵa qarsy baǵyttalǵan alaıaqtyq áreketterdiń jıilep bara jatqanyna nazar aýdarady.

— Alaıaqtar psıhologııalyq qysym men manıpýlıatsııa ádisin qoldanyp, shatastyrý úshin túrli stsenarıılerdi belsendi qoldanady. Ádette, alaıaqtar oqystan áreket etedi: qońyraý shalady nemese habarlama jiberedi, áńgime aıtqanda tabandylyq tanytady, adamdy emotsııalyq tepe-teńdikten shyǵarýǵa jáne oılanbaı sheshim qabyldaýǵa májbúrleý úshin qysym kórsetedi, — delingen Ulttyq bank habarlamasynda.

Aldaýdyń mynadaı shemalary jıi qoldanylady:

• ózderin zeınetaqyny «qaıta eseptep» beretin nemese qosymsha tólemderdi ýáde etetin zeınetaqy qorynyń qyzmetkerleri dep tanystyrady;
• ózderin jınaqtardy kóbeıtý ne syıaqy tóleý boıynsha «tıimdi» usynystary bar saqtandyrý kompanııalarynyń ókilderi retinde tanystyrady;
• bir kezderi dárilik zattar satyp alynǵan josyqsyz kompanııany sotqa bergenin jáne olardan ótemaqy alatynyn habarlaıdy, soǵan oraı derbes derekterdi berýdi jáne qarjylyq operatsııalardy júzege asyrýdy suraıdy;
• týystarynyń oıdan shyǵarylǵan problemalary (apat, qıyndyqtar) týraly habarlap, oqys oqıǵalardy oılap tabady jáne aqshany kýrerge shuǵyl berýdi talap etedi;
• ózderin quqyq qorǵaý organdarynyń nemese Ulttyq banktiń qyzmetkeri dep tanystyryp, jyljymaıtyn múlikti satýǵa jáne aqshany is júzinde alaıaqtarǵa tıesili «qaýipsiz shottarǵa» aýdarýǵa kóndiredi.

Ulttyq bank egde jastaǵy azamattardyń týystary men qamqorshylaryna mobıldik qurylǵylarda belgisiz nómirlerdi buǵattaý fýnktsııasyn ornatýǵa kómektesýdi, sondaı-aq kúmándi siltemeler boıynsha ótýden bas tartý, belgisiz faıldardy ashpaý jáne kúmándi qosymshalardy ornatpaý qajet ekenin únemi eskertýdi usynyp otyr.

— Sondaı-aq mobıldi banktik qosymshalarda (osyndaı fýnktsııa bar bolǵan kezde) senimdi tulǵanyń kúmándi qarjylyq operatsııalardy rastaıtyn nemese qabyldamaıtyn baptaý usynylady, bul qosymsha qorǵaý deńgeıin qosady.

Qazaqstan Ulttyq banki azamattardy tsıfrlyq servıster men qashyqtan kórsetiletin qyzmetterdi paıdalana otyryp, qarjylyq operatsııalardy jasaý kezinde qyraǵy bolýǵa shaqyrady. Kúmán týyndaǵan jaǵdaıda konsýltatsııa alý úshin ekinshi deńgeıli bankterge nemese Qazaqstan Respýblıkasynyń quqyq qorǵaý organdaryna júginý qajet. Qosymsha aqparat alý úshin 1477 qysqa nómiri boıynsha Ulttyq banktiń baılanys ortalyǵyna habarlasýǵa bolady, — delingen bank habarlamasynda. 

Aıta ketelik Saýda mınıstrligi jalǵan aqparat taratatyn alaıaqtardan saq bolýǵa shaqyrdy.