Sizder jaqsy biletin, belgili adam – Vıtse-prezıdent kim bolýy múmkin
ASTANA. KAZINFORM – Kelesi aptada nemese 10 kún ishinde elimizde Vıtse-prezıdent taǵaıyndalady. Bul týraly Memleket basshysy Qasym-Jomart Toqaev Táýelsizdik saraıynda otandyq jáne sheteldik BAQ ókilderimen ótken brıfıngte málim etti.
– Jurttyń bári Vıtse-Prezıdent laýazymy týraly surap jatyr. Rasynda, bul – aıtýly ózgeris. Biz Konstıtýtsııamyzǵa jańa laýazymdy ádeıi engizdik. Bul laýazym asa qajet dep aıtsaq, qatelespeımiz. Sebebi qazirgi bulyńǵyr zamanda mundaı laýazym elimizge óte qajet. Kelesi aptada nemese on kún ishinde Vıtse-prezıdent kim ekeni málim bolady. Men ony qazir anyq aıta almaımyn. Ol belgili, sizder jaqsy biletin adam bolady dep oılaımyn, – dep jaýap berdi Qasym-Jomart Toqaev tilshiler suraǵyna.
Aıta keteıik, Vıtse-prezıdentti Quryltaıdyń kelisimimen prezıdent taǵaıyndaıdy.
Atalǵan laýazymǵa keletin azamattyń saıası partııaǵa múshe bolýyna, depýtat atanýyna, joǵary qyzmet atqarýyna, tipti kásippen aınalysýyna jol joq. Al laýazymnan bosatý týraly sheshimdi Memleket basshysy qabyldaıdy.
Vıtse-prezıdent Memleket basshysynyń tapsyrmasymen eldiń syrtqy ókildigin qamtamasyz etýge, negizgi memlekettik ınstıtýttarmen ózara is-qımyl jasaýǵa, sondaı-aq azamattyq qoǵammen, ǵylymı, mádenı jáne saraptamalyq qaýymdastyqtarmen dıalogty damytýǵa mindetti.
Búgin Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde alǵashqy Quryltaı depýtattaryn saılaýǵa daýys berdi.
