Sizdi jalǵan aqparatpen jańylystyrǵan: Igor Lepeha depýtatpen sózge kelip qaldy
ASTANA. KAZINFORM — Májiliste quqyq buzýdyń aldyn alýǵa baǵyttalǵan birneshe zańdy bir zańǵa biriktirip jetildirýge arnalǵan zań jobasy talqylanyp jatyr.
Talqylaý kezinde depýtat Juldyz Súleımenova Іshki ister mınıstriniń orynbasary Igor Lepehaǵa bir top zańgerdiń atalmysh zań jobasyna qarsy ýájin jetkizdi.
— Áıel quqyqtary jónindegi, turmystyq zorlyq-zombylyq máselesimen aınalysyp júrgen sarapshylar, zańgerler bizge dabyl qaǵyp júgindi. Siz tanystyrǵan zań jobasynyń aıasynda 2009 jyly qabyldanǵan «Turmystyq zorlyq-zombylyq profılaktıkasy týraly» Zańnyń kúshin joıyp, ol zańdy osy zańǵa biriktirýdi usynyp otyrsyzdar. 2024 jyly áıelderdiń quqyǵyn qorǵap, balalardyń qaýipsizdigin saqtaýǵa arnalǵan zań qabyldadyq. Uryp-soǵý, densaýlyqqa qasaqana jeńil zııan keltirý baptaryn qylmys retinde saralaǵanbyz. 2009 jyldan beri jumys istep kele jatqan zańdy búgingi zańǵa biriktirýge ne negiz boldy? Meniń oıymsha, turmystyq zorlyq-zombylyq profılaktıkasy zańnyń kúshin joıý — 2023,2024 jyldary qabyldanǵan barlyq zańnan keri ketý, — dedi depýtat.
Igor Lepeha depýtatqa osy máselemen júgingen adamdar jalǵan aqparat aıtqan dep esepteıtinin málim etti.
— Túsindire ketkim keledi. Sózimniń basynda qoldanystaǵy zańdardyń ishindegi ýaqyt synynan ótken, tıimdiligin kórsetken normalardy ózgerissiz qaldyratynymdy aıtyp kettim. Uryp-soǵý men densaýlyqqa qasaqana jeńil zııan keltirýmen baılanysty baptardy qylmys retinde saralaý normalaryna kelsek, áıelder men balalardyń quqyǵyn buzýmen baılanysty baptar týraly aıtsaq, bári saqtalǵan. Qarasańyz, Qylmystyq kodekske de, Ákimshilik kodekske eshqandaı eleýli ózgeris engizgeli otyrǵan joqpyz, ıaǵnı, sizdi jalǵan aqparatpen jańylystyrǵany anyq. 2009 jylǵy zańdy qazirgi zańmen biriktirý máselesine kelsek, bul meniń bastamam emes. Joǵary jaqtan, naqty kimniń bastamasy boıynsha tapsyrma kelgenin bilip otyrsyz ǵoı, — dedi ol.
Igor Lepeha bul qujat zańnamadaǵy qaıshylyqtardy birizdendirý úshin ázirlenip jatqanyn eske saldy.
— Jasóspirimderdiń arasyndaǵy quqyq buzýdyń aldyn alý, maskúnemdiktiń aldyn alý sııaqty zańdardyń bárine kóptegen túzetý men ózgeris engizil keldi. Qazir olardyń keıbir baptary ekinshi zańnyń keıbir baptaryna qaıshy keletindeı jaǵdaıǵa jetken. Sondyqtan bizge bes zańdy biriktirip, jalpyǵa túsinikti bir zań etip jetildirý týraly tapsyrma berilgen, — dep túsindirdi mınıstrdiń orynbasary.
Aıta ketý kerek, ІІM deregi boıynsha, jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsedi.