Siz sekildi batyr bolǵym keledi…
TÚRKІSTAN. KAZINFORM — Alty jastaǵy túrkistandyq balanyń haty 100 jastaǵy maıdangerdi tebirentti.
Jeńis kúni qarsańynda Sozaq aýdanynda erekshe taǵylymdy kezdesý ótti. Qozmoldaq aýylynda turatyn 99 jastaǵy maıdanger, ulaǵatty ustaz Myrzahmet Jylysbaevtyń úıine kútpegen qonaq keldi. Aqqoltyq aýylyndaǵy Shoqan Ýálıhanov atyndaǵy mekteptiń 1-synyp oqýshysy — alty jasar Jiger Bekjanuly ardager atasyna arnap júrekjardy hat jazyp, ony ózi oqyp berdi.
Jeńis kúnine arnalǵan bul erekshe kezdesý — urpaqtar arasyndaǵy rýhanı sabaqtastyqtyń naqty kórinisi boldy. Jigerdiń hatyndaǵy shynaıy alǵys pen bala tilegi maıdangerdiń júregin tolqytyp, janaryna jas úıirdi.
Jigerdiń sózi qarapaıym bolsa da, maǵynasy tereń:
— Myrzahmet ata, siz soǵysta eldi qorǵadyńyz. Bizge beıbit ómir syıladyńyz. Sol úshin sizge alǵys bildiremin. Men sabaǵymdy jaqsy oqyp júrmin. Siz sekildi batyr bolǵym keledi. Sizdi maqtan tutamyn. Sizge densaýlyq, uzaq ǵumyr tileımin, — delingen hatta.
Hatty tyńdaǵan ardager tebirenip, kózine jas aldy. Alladan eldiń amandyǵyn tilep, bata berdi.«Eldiń bolashaǵy osyndaı balaqaılarmen jarqyn bolmaq», — dedi ol.
Myrzahmet Jylysbaev — ekinshi dúnıejúzilik soǵystyń ardageri ǵana emes, sanaly ǵumyryn jas urpaqty oqytýǵa arnaǵan ardaqty ustaz. Ult rýhanııatyna sińirgen eńbegimen el esinde qalǵan tulǵa.
Al Jiger — muǵalimder áýletinde tálim alyp jatqan, kishkentaı bolsa da júregi elge degen súıispenshilikke toly balaqaı. Onyń áreketi — qazirgi urpaqtyń boıynda patrıottyq tárbıeniń bar ekeniniń aıqyn dáleli.
Biri — soǵystyń surapylyn kórgen kónekóz qarııa, ekinshisi — bolashaqtyń ıesi bolatyn bala. Olardyń arasyndaǵy osyndaı júrekjardy baılanys — eldiń rýhanı birligin, tárbıelik qýatyn kórsetti.
Aıta keteıik, budan buryn Almatyda soǵys ardagerlerine arnalǵan 8 alleıa ashylǵanyn jazǵan bolatynbyz.