Siz kelgeli ıt te, qoqys ta qaptady, jaryq ta joq — Almatydaǵy aýdan turǵyny Erbolat Dosaevqa talap qoıdy

ALMATY. KAZINFORM – Almatyǵa Erbolat Dosaev ákim bolyp kelgeli qalada ártúrli másele kóbeıgen. Bul týraly Erbolat Dosaevtyń Túrksib aýdanynyń turǵyndarymen kezdesý kezinde Nurlan esimdi qala turǵyny aıtty.

Turǵynnyń aıtýynsha, máseleler azaıǵannyń ornyna, kóbeıip keledi.

«Máselelerdiń sheshilip jatqanyn kórmeppin. Men «Pıatıletka» shaǵyn aýdanynda turamyn. Onda, mine, 6 aı boldy, eki káriz qudyǵynyń qaqpaǵy jabylmaı jatyr. Bul jerde siz qyzmetkerlerińizdi ne jumys istete almaısyz, ne olar jumys istemeıdi. Eger olarǵa jumys istete almasańyz, ornyńyzdy bosatyńyz. Siz kelgeli ıt te qaptady, qoqys ta qaptady, jaryq ta joq, qysqasy tártipsizdik beleń alyp bara jatyr. Jumys istetý kerek. Kóp nárse sizdiń quzyretińizde ǵoı», - dedi qala turǵyny.

Óz kezeginde Erbolat Dosaev Túrksib aýdanynda kóp jumys júrip jatqanyn atap ótti.

«Ras, bir jerde úlgeremiz, bir jerde úlgermeımiz. Biraq bul ómir ǵoı. Bir jerde jumyskerlerim durys jumys istemeıdi. Biraq Túrksib aýdanynda kóp ózgeris bolyp jatyr. Qyzmetshilerdiń óz jumystaryn durys oryndaýyn muqııat baqylaýǵa alamyz», - dedi Erbolat Dosaev.

Túrksib aýdanynyń ákimi Baqytjan Aqjarov «Pıatıletka» shaǵyn aýdany boıynsha eki joba iske asyp jatqanyn aıtty.

«Bul «ALVIS» kompanııasynyń kárizdi sýmen jabdyqtaý jáne sý burý júıesin salý jumystary. Depovskaıa kóshesinde jańbyr kárizi boıynsha jumystar jasaldy, alaıda, onda káriz qaqpaqtary kóp urlanady. Bul máseleni bizge Nurlan myrza aıtqan, urlanǵan qaqpaqtardyń ornyna basqa qaqpaqtardy qoıǵanbyz, alaıda olar da qoldy boldy. Sondyqtan bul másele boıynsha polıtsııa jáne Ekologııa basqarmasymen birlesip jumys júrgizemiz», - dedi aýdan ákimi.

Erbolat Dosaev atalǵan másele men basqa da qylmystardyń aldyn alý úshin aýdanǵa bıyl shamamen 600 baqylaý beıne kamerasyn qoıý josparda bar ekenin aıtty. Sondaı-aq, shaǵym aıtqan turǵynnyń kóshesine de arnaıy beınebaqylaý kamerasy qoıylyp, atalǵan káriz qudyqtarynyń qaqpaqtary dánekerlenip, eshkim almastaı jabylatynyn aıtty.

Qala turǵyny odan bólek aýdanda esirtkini jasyryp ketýshilerdiń sany óskenin aıtty.

Erbolat Dosaev Túrksib aýdandyq polıtsııa basqarmasynyń bastyǵyna bul baǵytta tıisti jumystar júrgizip, máseleni baqylaýǵa alýdy tapsyrdy. Sondaı-aq, esirtki jasyrýshylar júretin kóshelerdi anyqtap, baqylaý beıne kameralaryn ornatý qajettigin jetkizdi.