Syıǵa tartý men renta sharttary erejelerine ózgerister engiziledi
ASTANA. QazAqparat - Búgin QR Parlamenti Májilisiniń jalpy otyrysynda Qazaqstan Respýblıkalyq keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat.
«Zań jobasy Qazaqstannyń 2010 jyldan 2020 jylǵa deıingi kezeńge arnalǵan quqyqtyq saıasat tujyrymdamasyn, sondaı - aq Úkimettiń zań jobalaý josparyn oryndaý maqsatynda ázirlengen. Zań jobasy azamattyq zańnamany damytýǵa jáne Azamattyq kodekstiń rólin nyǵaıtýǵa baǵyttalǵan. Onda taýar-aqsha qatynastary úshin zor mańyzy bar birqatar máselelerdi retteý usynylady»,-dedi QR Ádilet mınıstri Marat Beketaev.
Osy oraıda azamattyq quqyq qatynastary protsesine qatysýshylardyń dıspozıtıvtik jáne adaldyq qaǵıdattarynyń qoldanysyn kúsheıtý qarastyrylady. Mysaly, múlik ıesi ıemdený merziminiń ótip ketýine qaraı quqyqqa syıymdy áreketter nátıjesinde múlikti ıelengenin dáleldese, ol adal ıesi bolyp sanalatyny qarastyrylǵan.
Munymen qosa, azamattyq zańnamanyń zańdy tulǵalar týraly normalaryn jetildirý usynylady. Osy maqsatta zańdy tulǵalarǵa ózge oqshaýlanǵan qurylymdyq bólimsheler qurýǵa múmkindik berilip otyr. Bul bıznesti júrgizý úshin artyq ákimshilik tosqaýyldardy joıýǵa qosymsha shara bolady. Sonymen qatar, sharýashylyq seriktestiktegi úlesti ıelikten shyǵarý jónindegi mámileniń notarıattyq nysany belgilenedi jáne enshiles uıymnyń uǵymy naqtylanady.
«Zań jobasymen zattyq quqyqtar jáne olardyń týyndaý negizderi týraly erejelerdi keńeıtý qarastyrylǵan. Atap aıtqanda, menshik quqyǵy jáne ózge de zattyq quqyqtar týraly jalpy jáne arnaıy erejeler júıelendi jáne Azamattyq kodekske «Ózge de zattyq quqyqtar» atty jańa taraý engizildi.
Buǵan qosa, múlikti bólý múmkin bolmaǵan kezde, sot ony jarııa saýda-sattyqta satý týraly sheshim qabyldaý arqyly jáne alynǵan somany keıinnen ortaq menshiktiń qatysýshylary arasynda bólýdi kózdeıtin norma usynylady. Bul túzetý Konstıtýtsııalyq Keńestiń normatıvtik qaýlysyn oryndaý maqsatynda engiziledi»,-dedi mınıstr.
Belgili bolǵandaı, mindettemeler týraly jalpy jáne arnaıy normalardy jetildirý usynylady. Azamattyq kodekste qamtylǵan mindettemeler týraly normalardyń edáýir kólemi jalpy jáne arnaıy normalardyń araqatynasyn aıqyndaýdy talap etedi. Osyǵan oraı, zań jobasynda sharttyq jáne sharttan tys mindettemelerge jalpy erejelerdi qoldaný múmkindigi kózdeledi.
«Zań jobasy aıasynda Azamattyq kodekstiń sharttyq mindettemelerine, atap aıtqanda, satyp alý, syıǵa tartý, renta sharttary, komıssııa týraly erejelerine ózgerister engiziledi»,-dep atap ótti M. Beketaev.
