«Sıýtsaı» dinı uıym ba – Mádenıet mınıstrliginiń jaýaby
ASTANA. KAZINFORM – «Sıýtsaı» uıymynyń qyzmetine qatysty ınternet-siltemelerge dintaný saraptamasy júrgizildi. Bul týraly Májilis depýtattarynyń saýalyna Mádenıet jáne aqparat mınıstriniń mindetin atqarýshy Qanat Ysqaqovtyń jaýabynda aıtylǵan.
- Dinı qyzmet salasyndaǵy ókilettikter aıasynda «Dinı qyzmet jáne dinı birlestikter týraly» Qazaqstan Respýblıkasy Zańynyń 4-baby 6-tarmaqshasyna sáıkes, 2023 jylǵy qyrkúıekte «Sıýtsaı» uıymynyń qyzmetine qatysty ınternet-siltemelerge dintaný saraptamasy júrgizildi. Júrgizilgen dintaný saraptamasynyń nátıjesi boıynsha usynylǵan materıaldardyń mazmuny dinı baǵytta bolmaýyna baılanysty olar dintaný saraptamasynyń obektilerine jatpaıdy (qurylymy, din negizderi, dinı praktıka, dinı qyzmettiń nysandary men ádisteri joq). ıAǵnı, «Sıýtsaı tsıfrlyq psıhologııasy» degenimiz máni boıynsha astrologııaǵa, nýmerologııaǵa jáne ózin-ózi taný taqyrybyndaǵy sýbektıvti ınterpretatsııalar men alypsatarlyqtarǵa negizdelgen jáne ǵylymı rastalmaǵan, dinı mártebesi joq baǵyttarǵa uqsas uıym sanalady, - dedi vıtse-mınıstr.
Onyń atap ótýinshe, ashyq derekkózder men beınematerıaldardy (sheberlik klastar) zerdeleý nátıjesi dinı qyzmet pen tabynýshylyq praktıkasy belgileriniń joqtyǵyn rastaıdy.
- Bul rette osy uıymdy din sanatyna qosý múmkin emec. Tsıfrlyq ortada osyndaı baǵyttardyń tanymal bola túsýin eskerip, mundaı uıymdardyń jańsaq pikirlerge ákep soqtyrýy múmkin ekenin túsine otyryp, mınıstrlik azamattardyń synı turǵyda qabyldaýy men turaqtylyǵyn qalyptastyrý maqsatynda alaıaqtyq qurylymdar men destrýktıvti dinı aǵymdar týraly habardar etý boıynsha turaqty negizde jumys júrgizýde, - dedi Qanat Ysqaqov.
Májilis depýtaty Aıdos Sarym «Sıýtsaı» ataýyn jamylǵan toptar jabyq formattaǵy sharalar ótkizip, óz ýaǵyzdaryn keńinen taratyp júrgenine alańdaýshylyq tanytqan bolatyn.
- Olardyń basym bóligi – lıtsenzııasyz, sertıfıkatsyz, tirkelmegen tulǵalar. Jalǵan ilimniń basty maqsaty – azamattardy «rýhanı damý» uranymen ılandyryp, sandar men sımvoldarǵa súıengen psevdoteorııa arqyly materıaldyq paıda tabý. Nátıjesinde kóptegen adam, ásirese áıelder men jastar, qarjylaı shyǵynǵa ushyrap, psıhologııalyq táýeldilikke túsýde, al keıbiri otbasylyq jáne áleýmettik kúızeliske tap bolyp otyr, – degen edi depýtat.