Syryn áli eshkim tappaǵan jerasty úıi
ASTANA. QazAqparat - Armenııadaǵy jerasty úıiniń syryn áli eshkim tapqan joq. Týrısterdi de qupııaǵa toly osy meken qyzyqtyrady, dep habarlady www.24.kz.
Shaǵyn ǵana aýylda ornalasqan jerasty úńgiri Levon Arakelıannyń úıinde ornalasqan. Onyń avtory da ózi. Erevanǵa jaqyn ornalasqan Arındj mekeninde HHІ ǵasyrdyń úńgir labırınti bar. Arhıtektory - Levon Arakelıan. Ańyzǵa sensek, Levon sheberdiń jubaıy jerqoıma qazyp berýin suraǵan eken. Nátıjesinde ártúrli deńgeıde ornalasqan tóbesi tegis 7 zaly bar labırınt paıda bolypty. Avtor jerasty úńgirin qazýǵa geodezııa qural-jabdyǵynsyz, syzbasyz kirisedi. Degenmen, jasaǵan dúnıesinde múlt ketken jeri joq. Qazir munda kelýshilerdiń qarasy kóp. Týf jáne bazaltpen mánerlep qaptalǵan kóptegen dálizder kórer kózdi tań qaldyrady. Injenerler men arhıtektorlardy da tamsandyrǵan osy kórinis. Ǵalymdar sheber 23 jyldyń ishinde jalǵyz ózi qolda bar quraldarymen, zilbalǵa, balǵa jáne keskishpen osynshama jumysty qalaı istegen degen suraqqa jaýap tappaı keledi.
«Onyń qurylysshy degen bilimi bolmaǵan. Sonyń ózinde aýa almasyp turatyn júıeni oılap tapty. Úńgirdiń eń tómen degen jeriniń ózinde taza aýa bar. Mundaǵy temperatýra jyl boıy 7-10 gradýs. Mine, mynaý ventılıatsııa shahtasy», - deıdi ekskýrsııa jetekshisi Ashot Levonıan.
Bul úńgirge túsken týrıster ertegiler álemine tap bolǵandaı kúı keshedi. Onda júrip-turatyn joldardyń barlyǵy sofıt shamdarymen qamtylǵandyqtan, alǵan áserińiz eselene túsedi. 21 metr tereńdikte uzyndyǵy 150 metr bolatyn dálizdiń asa qasıetti dep sanalatyn núktesi de bar.
Úńgirdiń sońyna deıin qazylmaı qalǵan tustary da bar. Alaıda, halyq arasynan shyqqan sáýletshiniń 13 nemeresi atasynyń isin jalǵastyra alady. Degenmen, Levon Arakelıan bul jerasty álemin ne úshin jaratqanyn eshkimge aıtpaı ómirden ótipti.
