Syrymdyq sharýalarǵa 49,1 mln teńge nesıe berildi - BQO
Aýdandyq jumyspen qamtý ortalyǵynyń dırektory Salamat Imanǵalıevtiń aıtýynsha, Elbasynyń bıylǵy 31 qańtardaǵy «Qazaqstannyń úshinshi jańǵyrýy: jahandyq básekege qabilettilik» atty Joldaýynan týyndaıtyn baǵdarlamanyń úsh baǵyty aıasynda 10 aıda Syrym aýdany boıynsha qatysýshylar sany 1 043 adamǵa jetti. «Baǵdarlamaǵa qatysýshylardy tehnıkalyq, kásiptik bilimmen jáne qysqa merzimdi kásiptik oqýmen qamtamasyz etý» 1-baǵyty boıynsha qysqa merzimdi kýrstarǵa ortalyq arqyly 159 adam jiberildi. Baǵdarlamanyń jańalyǵy bolar, usynylǵan kásiptik mamandyqtarda alýan túrlilik, san salalylyq baıqalady. Mysaly, argondyq dánekerleý, gaz, elektrmen dánekerleýshi, gaz operatory, shashtaraz, EEM operatory, is júrgizýshi, aspaz, tiginshi mamandyqtarynan bólek, manıkıýr, bet árleýshi, áleýmettik qyzmetker, 1S býhgalter, bala kútýshi, massaj jasaýshy, kondıter, AutoCAD kýrsy sııaqty mamandyqtar ıgerilýde. Kúni búgin Syrym aýdany boıynsha kásiptik oqýyn aıaqtaǵan 123 adamnyń 17-si jumysqa ornalasty.
Baǵdarlamanyń «Jappaı kásipkerlikti damytý» ekinshi baǵyty boıynsha osy jyldyń 10 aıynda 13 adam mal sharýashylyǵyn damytý maqsatynda 49,1 mln teńge nesıe aldy. Olardyń ishinde jeti sharýa «Aýyl sharýashylyǵyn qarjylaı qoldaý qory» AQ arqyly 30 mln 850 myń teńge nesıe alsa, 6 adam «Agrarlyq nesıe korporatsııasy» AQ arqyly 18 mln 245 myń teńge nesıeni «jumysqa saldy».
Jumyspen qamtýǵa negizinen jastar sanaty muqtaj bolyp keledi. Osy oraıda «Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý» dep atalatyn baǵdarlamanyń úshinshi baǵyty da belsendilikke ıe, bastysy, nátıjeli bolyp otyr. Jastardy jumyspen qamtý úshin aýdanda «Jastar tájirıbesi» baǵdarlamasy arqyly 75 jas maman eńbek tájirıbesin arttyrmaqqa jumys berýshilermen kelisimsharttyń negizinde mekemelerge joldandy. Bıyl baǵdarlama arqyly tájirıbeden ótýge joldanǵandarǵa tólenetin aılyq eńbekaqynyń kólemi edáýir artyp, 1 adamnyń eńbekaqysy 56 725 teńgeni qurady. Jumysyn aıaqtaǵan 34 adamnyń 15-i jumysqa ornalasty.
Halyqty jumyspen qamtýdyń taǵy bir túri - áleýmettik jumys. Osy on aıdyń ishinde aýdan boıynsha áleýmettik jumys oryndaryna 40 adam joldandy. Aqyly qoǵamdyq jumysqa derekqor boıynsha bıylǵy jyldyń 10 aıynda 13 jumys berýshi úshin 350 adam jumysqa tartyldy.
Nátıjeli jumyspen qamtýdy jáne jappaı kásipkerlikti damytý baǵdarlamasy negizinde Syrym aýdany boıynsha osy ýaqytqa deıin 406 adam jumysqa ornalasty. Sonyń ishinde memlekettik jáne úkimettik baǵdarlamalar sheńberinde jumysqa ornalasqandar 35 adam bolsa, memlekettik qoldaý sharalarynsyz jumysqa ornalastyrylǵandar sany 371-di qurap otyr.
El eskerýge tıisti bir jaıt, halyqty jumyspen qamtýda maqsatty topqa jatatyn adamdarǵa basymdyq beriledi. Bul basymdyq is júzinde saqtalýda. Osy aılardyń ishinde az qamtylǵan otbasylardyń eńbekke jaramdy múshelerinen 159 adam, múmkindigi shekteýli azamattardy jumyspen qamtýda 36 adam áleýmettik qorǵaý sharalaryn alyp otyr. 29 jasqa deıingi jastardy jumyspen qamtýda 354 jas jumyspen qamtyldy.
Aldaǵy mindettiń biri - baǵdarlamanyń aqparattyq túsindirý jumystaryn únemi júrgizý. Osy maqsatta bıyldyqqa aýdan ortalyǵynda bos jumys oryndarynyń jármeńkesi úsh ret uıymdastyryldy. Jármeńke qatysýshylardyń deni keńes alýshylar bolyp keledi.
Syrym aýdanynda 2017 jyldyń 1 qarashasyna 137 adam resmı jumyssyzdar, 1 261 adam jumys izdeýshiler esebinde tur. Jumyssyzdyq deńgeıi 1,2 paıyz.
Aıta keteıik, memlekettik baǵdarlamanyń shapaǵatyn kórip, malyn kóbeıtip otyrǵandardyń biri - Bulan aýyldyq okrýgi Jambyl aýylynda turatyn Ǵalym Kárimov. 1967 jyly ómir esigin ashqan ol 1988-2000 jyldary Jambylda júrgizýshi qyzmetin atqarǵan. Aýyl tirshiligi negizinen malǵa baılanysty ekendigi belgili. Aýdandyq jumyspen qamtý ortalyǵy qyzmetkerleri eldi mekenderdi aralaǵan kezde atalmysh baǵdarlama týraly bilip, sosyn nesıe surap, jolyqqan.
«Mal sharýashylyǵyn damytamyn degen oımen 1 mln 350 myń teńge nesıe aldym. Osy qarjyǵa bes bas sıyr, qalǵan qarjyǵa jem-shóp satyp aldym. Qazirgi ýaqytta artylǵan sút, et ónimderin satyp, paıda kórýdemin. Aldaǵy qystan mal basyn aman alyp shyǵyp, kóbeıtý qamyndamyn. Munyń bári - memlekettik baǵdarlamanyń arqasy. Sondyqtan aýdandyq jumyspen qamtý ortalyǵyna rızashylyǵymdy bildiremin», dedi «QazAqparat» tilshisine Ǵ.Kárimov.
