Syrym Sháriphanov: Jylytý maýsymyna deıin peshter men murjalardy tazalaý kerek

ASTANA. QazAqparat – Tótenshe jaǵdaılar mınıstri Syrym Sháriphanov Abaı oblysy turǵyndarymen kezdesýinde jylytý maýsymy aldyndaǵy órt qaýipsizdigi sharalary jóninde aıtyp berdi, dep habarlaıdy QazAqparat tilshisi.

«Osy múmkindikti paıdalana otyryp, jergilikti turǵyndardy jylytý maýsymyna deıin peshter men murjalardy tazalaýǵa shaqyramyn. Sonymen qatar, qazandyqtardy jylytý kezeńine daıyndaý sharalaryn aıaqtaý qajettigine jergilikti atqarýshy organdardyń nazaryn aýdarǵym keledi», - dedi ol.

Mınıstr atap ótkendeı, jylý berý kezeńinde mınıstrliktiń basty mindeti – turǵyn úı sektorynda ólim-jitimniń ósýine jol bermeý. Júrgizilgen profılaktıkalyq jumystar nátıjesinde turǵyn úı sektorynda qaza tapqandar sany respýblıka boıynsha 6%-ǵa azaıdy. Abaı oblysynda da qaıǵyly jaǵdaıdyń jıi bolýyna jol berilmedi.

Sonymen birge, Syrym Sháriphanov azamattardyń qaza bolýynyń negizgi sebepterine jeke toqtaldy: bul - otty abaısyz paıdalaný, mas kúıinde tósekte temeki shegý, elektr aspaptary men peshterdi, sondaı-aq gaz ballondaryn paıdalaný kezinde órt qaýipsizdigi erejelerin buzý.

«Birlesken reıd júrgizý kezinde halyqtyń áleýmettik osal sanaty anyqtalady. Jergilikti atqarýshy organdar olardy esepke alady. Oblys boıynsha osy sanattaǵy 7 myńnan astam otbasy bar. Olarǵa kómir satyp alýǵa, peshterdi, jylytý júıelerin jóndeýge ataýly kómek kórsetiledi jáne bizdiń usynysymyzben órt datchıkteri ornatylady. Máselen, óńirde 750-den astam datchık ornatylǵan. Aldaǵy jylytý kezeńinde taǵy myńnan astam úıge ornatylady», - dedi spıker.

Bıyl respýblıka boıynsha 30 myńnan astam úı tabıǵı gaz, kómirtegi totyǵy jáne tútin datchıkterimen jabdyqtalǵan. Olardyń jumysy Astana qalasynda, Shyǵys Qazaqstan, Aqmola, Qyzylorda oblystarynda 27 adamdy ajaldan arashalap qaldy.