Syrym batyrdyń úzeńgisi delingen jádiger tabyldy
ORAL. QazAqparat - Syrym batyrdyń úzeńgisi delingen kóne jádiger tabyldy. Bul týraly Oral qalasynda turatyn belgili ólketanýshy, Qazaqstannyń qurmetti jýrnalısi Qaıyrjan Hasanov málim etti, dep habarlaıdy «QazAqparat» tilshisi.
Onyń aıtýynsha, kúmis úzeńgini osy kezge deıin qazirgi tańda Almaty qalasynda turatyn Qaıypbergen Dúısenov saqtap kelgen. Ol Qaraqalpaqstanda dúnıege kelgen, qazaq. Óziniń sózine qaraǵanda, kóne buıymdardy jınaýmen aınalysqan. Birde ol ózbek keıýanadan kúmis úzeńgini satyp alǵan. Keıýana ony «Ǵaıyp ataniki» degen. Bul tarıhı derekpen sáıkes keledi. Syrym Datulynyń (1742-1802) jerlengen ornyn anyqtaý maqsatynda 2007 jyldyń mamyr aıynda BQO tarıh jáne arheologııa ortalyǵy ǵylymı ekspedıtsııa uıymdastyryp, sonyń nátıjesinde batyrdyń beıiti Ózbekstannyń Horezm oblysy Gúrlen aýdany «Ǵaıyp ata» qorymynda ekeni anyqtalǵan bolatyn. Ómiriniń sońǵy kezeńinde ózbek eline barǵan Syrym batyrdy jergilikti jurt ǵaıyptan kelgen baba, «Ǵaıyp ata» dep atap ketken. Sondaı-aq dushpandary onyń úzeńgisine ý jaǵyp óltirgen degen áńgime de bar.
Úzeńgimen birge kúmis shaqsha da saqtalǵan, áıtse de onyń kimdiki ekendigi belgisiz.
Syrym Datuly atyndaǵy Syrym aýdandyq tarıhı-ólketaný mýzeıiniń meńgerýshisi Aınagúl Oıshybaevanyń naqtylaýynsha, Qaıypbergen Dúısenov úzeńgi men shaqshany syrymdyq murajaıǵa tapsyrmaqshy. Oǵan Syrym Datulynyń 275 jyldyǵyna arnalǵan mereıtoılyq sharalarǵa shaqyrtý jiberildi. «Úzeńginiń qaı ǵasyrǵa jatatynyn saraptama jasap, anyqtaýǵa bolady», dedi «QazAqparat» tilshisine A.Oıshybaeva.
