Syrym batyr týraly jańa tarıhı romannyń tusaýy kesildi
ASTANA. 21 qarasha. QazAqparat - Búgin Astanada ótken «Azattyq týyn alǵash kótergen ardaqty tulǵa» atty Syrym Datulynyń 270 jyldyǵyna arnalǵan ǵylymı-praktıkalyq konferentsııa aıasynda Syrym batyrdyń ómirbaıanyn burynnan zerttep-zerdelep kele jatqan belgili jazýshy Qajyǵalı Muhanbetqalıulynyń «Tar kezeń» atty tarıhı romanynyń tusaýkeseri boldy.
Roman batyr ómirbaıanyn zertteýdiń jıyrma jyldyq jemisi bolyp tabylady. Kórkem shyǵarmada muraǵat materıaldary, ǵylymı, tarıhı jáne ǵylymı-buqaralyq ádebıetter boıynsha júrgizilgen zertteýlerge negizdelgen faktiler men oqıǵalar baıandalady.
«Bul roman qazaq oqyrmanynyń kópten beri kútken kitaby dep aıta alamyz. Óıtkeni Keńes odaǵy kezinde tarıhı romandar jazýda «bým» bolǵan. Al qazir tarıhı romandarǵa degen suranys azaıyp, kerisinshe onyń kórkemdigine degen talap kúsheıe tústi. Al Qajyǵalı Muhanbetqalıulynyń «Tar kezeńi» osy talaptarǵa tolyǵymen jaýap beredi dep senimmen aıta alamyn», - deıdi belgili jazýshy, qoǵam qaıratkeri Tólen Ábdik.
580 bettik kitap qatty muqabamen, kórkem sýrettermen óńdelip basylǵan. Sol kezderdegi Reseı ımperııasynyń ofıtserleri kıgen kıimder, qazaq batyrlarynyń saýyttary avtordyń kóp jyldyq jınaǵan materıaldary negizinde sýretshilerdiń qylqalamynan shyqqan. Kitap 2000 tırajben basyldy. Batys Qazaqstan oblysynyń ákimi taǵy 1000 danaǵa tapsyrys berip, elimizdiń kitaphanalaryna taratý nıetin bildirip otyrǵan kórinedi.
