Syrtynda «Reseı Federatsııasynyń aýmaǵynda satylýǵa arnalmaǵan» degen jazýlary bar ımportty taýarlar tekserilip jatyr
ASTANA. Qazannyń 30-y. QazAqparat /Gúlmıra Álıakparova/ - QR Indýstrııa jáne saýda mınıstrligi qazaqstandyq dúken sórelerinde «Reseı Federatsııasynyń aýmaǵynda satylýǵa arnalmaǵan» degen jazýlary bar ımportty taýarlardy tekseriske aldy.
Bul týraly búgin jýrnalısterge arnap ótkizilgen baspasóz máslıhatynda vedomstvo janyndaǵy Saýda komıtetiniń tóraǵasy Aıdar Qazybaev aıtty, dep habarlaıdy QazAqparat.
Komıtet tóraǵasynyń aıtýynsha, QR Aýyl sharýashylyǵy mınıstriniń tóraǵalyǵymen jumys isteıtin Baǵalardy turaqtandyrý boıynsha jumys toby qazirgi ýaqytta elimizdiń barlyq saýda oryndarynda kezdestirýge bolatyn, japsyrma qaǵazdarynda «Reseı Federatsııasynyń aýmaǵynda satylýǵa arnalmaǵan» degen jazýlary bar ımportty taýarlardy tekserip jatyr. Ázirshe jumys tobynyń nazaryna osyndaı jazýy bar temir qalbyrdaǵy «Şadrınskoe» súti ilikti.
«Reseıde óndirilgen taýar nelikten óz aýmaǵynda satylýǵa tyıym salynady jáne ol nelikten Qazaqstanǵa ımporttalyp otyr. Osyny anyqtaý úshin, qazir «Şadrınskoe» sútiniń quramyna zerthanalyq taldaýlar júrgizip jatyrmyz. Bul másele boıynsha jaǵdaıdy bir aıdyń kóleminde anyqtaıtyn bolamyz», - dedi ol.
A.Qazybaevtyń pikirinshe, bul jaǵdaıǵa birneshe boljam jasaýǵa bolady. Atalmysh ónimniń tehnıkalyq reglamenti RF-nyń reglamentimen sáıkes kelmeı, kerisinshe qazaqstannyń talaptaryna saı bolýy múmkin. Al ekinshi másele - onyń quramynda.
Osy oraıda, mınıstrlik ókili saýda salasynda jumys isteıtin barlyq kásipkerlerden, japsyrma qaǵazdarynda osyǵan uqsas kúmándi jazýlary bar taýarlardy el aýmaǵyna ákelmeýdi jáne dúken sórelerine shyǵarmaýdy surady.
